Ambasadorja e SHBA, Yuri Kim u shpreh se presidenti Ilir Meta duhet të luajë rol unifikues në politikën shqiptare, ndërkohë që Shqipëria po pergatitet për zgjedhjet parlamentare të 25 prillit.
Ajo kujtoi në “Opinion” rastin e pandemisë ku presidenti mbledhi Këshillin e Sigurisë Kombëtare, duke shtuar se pret që Ilir Meta ta luajë sërish këtë rol pozitiv.
“Mendoj se ka një rol shumë unik dhe shumë të rëndësishëm që presidenti mund të luajë si bashkues i vendit. Dhe kur e luajti atë rol në fillimet e pandemisë Covid19 dhe thirri Këshillin e Sigurisë Kombëtare, duke bërë bashkë jo vetëm Kryeministrin por edhe udhëheqësin kryesor të opozitës, mendova se ishte një shembull vërtet i fuqishëm dhe pozitiv.
Dhe shpresoj që kjo është diçka që do ta përsërisë. E di që ky është një rol që do ta vlerësonte populli shqiptar. Di që është një rol që Uashingtoni sigurisht e vlerëson, ndaj pres me kënaqësi ta shoh të luajë një rol shumë pozitiv”, u shpreh Kim.
Kohët e fundit, Presidenti Meta duket sikur ka marrë rolin e kreut të opozitës duke u përfshirë në disa përballje direkte me kryeministrin Edi Rama dhe mazhorancën.
Pa.Va/Fjala.al
