Të mërkurën pasdreke, Kastrioti arriti një fitore të madhe, teksa ekipi i Ramadan Ndreut triumfoi 2-1 ndaj Partizanit, në takimin që u zhvilluar në stadiumin e qytetit të Kamzës.
Tri pikë shumë të rëndësishme për krutanët e rikthyer në elitë, teksa trajneri Ndreu analizoi takimin duke u shprehur se skuadra e tij e mendon gjithmonë fitoren. Ndreu ka zbuluar gjithashtu se në diskutimin që kishte me presidentin, i kishte kërkuar që të kishin një skuadër të fortë në fillim të kampionatit, pasi në fund të gjithë të tillë janë.
“Ishte një ndeshje shumë e vështirë, në çdo sekondë ne mendojmë ta fitojmë ndeshjen, – ka thënë trajneri i Kastriotit. – Ishte një ndeshje e luftuar. Ishim shumë të kujdesshëm në fazën e mbrojtjes dhe e kishim përgatitur kështu ndeshjen dhe në fund ia dolëm. Por kjo ishte vetëm një ndeshje. Në miqësore kemi luajtur mirë dhe kemi dhënë shenja se skuadra funksionon. Nëse në plan të parë kemi lojën luftarake atëherë mund t’ia dalim të marrim rezultate pozitive.
“Skuadra merr notën 8, kishte momente të veçantë, sidomos në mbrojtje, ku ishim shumë mirë, – ka vijuar kreu i stolit krutan analizën e tij. – Unë kam besim se skuadra do funksionojë mirë në të dyja fazat e lojës. Unë në konsultimet e mia, me presidentin kemi debatuar që skuadra të jetë e fortë në fillim të kampionatit, të jetë më e fortë se në fund, pasi në ndeshjet e fundit të gjithë janë të fortë. Duhet të synojmë pikët maksimale gjithmonë.”
Pa.Va/Fjala.al
