Është mundur me dy gola të shpejtë përballë Tiranës të mërkurën, në takimin e luajtur qindra kilometra larg kryeqytetit, në Korçë, për shkak të mungesës së një stadiumi në kryeqytet, aty ku po rinovohet si fusha e “Selman Stërmasit, ashtu edhe ajo e “Arenës Kombëtare”, dhe nuk ngurron të marrë përsipër barrën e fajit.
“Kur humb ndeshjen përgjegjësia e parë është e trajnerit, – ka deklaruar trajneri i Kukësit, Skënder Gega. – Grupi nuk funksionoi ashtu siç duhej. Ishte ndeshje e parë. Do të përpiqemi të korrigjohemi. Nuk e mendoja se do të humbnim në këtë mënyrë.”
Megjithatë, ai nuk ka ngurruar “të vërë dorën në plagë”, teksa thotë:
“Një pjesë e madhe e futbollistëve nuk dhanë atë që pritej. Shpresoj të ketë qenë vetëm ndeshja e parë. Do e shikojmë me qetësi situatën, se kush ka çaluar. Grupi është ai që merr meritat, por merre dhe përgjegjësitë.
Kjo humbje nuk është se vendos kampionatin. Po nuk vure shpirtin dhe po nuk luftove si grup, është e vështirë t’ia dalësh. U bëmë shumë akademik, çdo lojtar donte topin në këmbë.”
“Jam i zhgënjyer, patjetër që do marrim përgjegjësitë dhe do të shikojmë me optimizëm, – ka vijuar Gega. – Ndaj Volfsburgut luajtëm me disiplinë, unë këtë dua. Sidoqoftë, ishte ndeshje e parë dhe duhet kjo humbje për të nxjerrë mësime. I kemi ndarë detyrat me emra. Unë mendoja dhe besoja që mbas gabimit të parë njerëzit marrin përsipër. Nuk bëhen 2 gabime radhazi. I patëm disa raste, por nuk të kënaqte mënyra sesi luajtëm. Shpresoj që të ketë qenë vetëm kjo ndeshje kështu e t’i shikojmë gjërat me optimizëm.”
Pa.Va/Fjala.al
