Deputeti Halit Valteri ka hedhur akuza nga foltorja e Kuvendit lidhur me integrimin e Shqiprisë në BE duke shigjetuar kryeministrin Rama se kjo i shërben këtij të fundit për të mbuluar të zezat që i ka bërë vendit.
Sipas Valterit më kot bëhen thirrjet nga ambasadorja amerikane sepse Shqipëria nuk ka për të ndryshuar asnjëherë nëse “trekëndëshi i djallit” sic e quan ai treshen Rama-Basha Meta nuk largohen nga pushteti, ndërsa bën thirrje që populli t’ja tregojë vendin atyre në 25 prill.
“Këtë e dimë të gjithë, është e dukshme si drita e diellit, Ju duke lënë Shqipërinë jashtë kornizës së BE-së shpëtoni veten tuaj nga të gjitha të zezat që i keni bërë këtij vendi, shpëtoni veten tuaj nga krimet dhe vjedhjet e tmerrshme që i keni bërë shtetit. Jo më kot SPAK-un e ka zënë gjumi letargjik qëkur prej se u krijua, e kthyet në organ KAPS pavarësisht nga investimi i partnerëve dhe miqve perëndimorë. Më kot bën thirrje ambasadorja amerikane.
Më kot ngre zërin Brukseli, këtu asgjë nuk ka për të ndryshuar pa u larguar nga pushteti ata që i kemi quajtur ndoshta me shumë të drejtë “trekëndëshi i djallit”, Edi Rama, Lulzim Basha dhe Ilir Meta. Këta janë pengmarrësit më të mëdhenj të fateve të shqiptarëve dhe thirrja ime është që këtyre mamuthëve të korruptuar t’ua tregojmë vendin në 25 prill.
Të mos kemi asnjë dilemë, asnjë dyshim, pa largimin e këtyre të treve nga pushteti, Shqipëria do kthehet edhe 30 vite të tjera mbrapa. Do ngelim të fundit jo vetëm në Europë, por edhe në Rajon, më keq se kaq nuk do të ketë, as sovranitetin s’e kemi të sigurtë me “trekëndëshin e djallit” në pushtet”, përfundon Valteri fjalën e tij./Bl.Ba/Fjala.al