Nga Erald Shulla
E gjithë bota dhe njerëzimi prej muajsh janë në luftë me armikun e përbashkët dhe të padukshëm covid-19, i cili nuk ka kursyer asnjë, është vërsulur padallim kombësie, ngjyre dhe feje, në të gjithë kontinentet.
E sikur kjo mos të mjaftonte, aktet terroriste, befas shpërthejnë deri në metropolet e kulturës dhe të mirëqenies. Vjena, e bukura e natyrës dhe e artit, Vjena e valseve dhe e mendimtarëve, Vjena perandorake, simbol i mirëkuptimit dhe paqes, mikja e shqiptarëve, u godit mizorisht nga një akt terrorist prej disa të marrëve, të cilët si të dërguarit e djallit e me veshje të kamufluar si njerëz fetarë, sulmuan më verberisht se virusi i tanishëm, duke derdhur breshëri armësh mbi kalimtarët e rastit dhe skuqur rrugët e qytetit me gjakun e të pafajshmëve.
Ky akt kriminal dhe terrorist na tronditi të gjithëve. Aktet terroriste janë të papranueshme për çdo vend, dhe aq më tepër kur ndodhin në një qytet aq paqësor si Vjena evropiane, e librit dhe ngjyrave.
Nëse covidi e distancoi botën dhe njerëzimin, në luftën kundër terrorrizmit, padiskutim që ne jemi më të bashkuar pavarsisht, kufijve, gjuhës apo besimit. Kjo ngjarje e tmershme në rrugët e kryeqytetit austriak kishte tre aspekte: kriminelët terroristë, viktimat e pafajshme dhe heronjtë e vertetë të policisë.
Ajo që na habit, ishte që mediat Austriake dhe ato Evropiane, përtej raportimit të ngjarjes përhapën shpejt dhe një lajm ku flitej që një prej terroristëve i cili ishte ekzekutuar nga forcat e policisë ishte me rrënjë shqiptare.
Kjo na shokoi edhe më tepër! Një shqiptar i cili kryen akte terroriste në mes të Evropës të cilën ne duam dhe presim prej kaq shumë vitesh të intgrohemi. Të bëhemi pjesë e saj, politike ekonomike dhe kulturore, e jo vetëm si pjesë gjeografike.
Shqipëria dhe shqiptarët mund të kenë probleme pafund të aspekteve të ndryshme, deri edhe tek prapambetja e shoqërisë për shkakun e izolimit prej dekadash nga sistemi diktatorial, por kurresesi Shqipëria nuk është burim dhe shqiptarët terroristë.
Në një vend si i yni, ku krenohemi për harmoninë fetare që ka midis njerëzve apo gjatë luftes se dytë botërore mbajtëm dhe shpëtuam hebrenj, si në asnjë vend, teksa përndiqeshin mizorisht apo mbajtëm ushtarët Italianë, që na erdhen si pushtues fashiste, e kur u mundën, i percollëm vellazërisht, etj, etj, nuk mund të ketë asnjë lidhje me terrorizmin, e aq më pak me atë që lidhet me abuzimin në emër të fesë.
I riu terrorist me origjinë shqiptare nga Maqedonia e Veriut dhe shtetas Austriak, i cili ishte bërë pjesë e organizatës terroriste ISIS, nuk ishte i vetmi shqiptar në këtë ngjarje… Shumë pak u fol dhe u raportua prej mediave që një prej viktimave të pafajshme ishte me origjinë shqiptare, i ndjeri Nexhip Vrenezi.
Shumë pak u fol që pjesë e operacionit të policisë austriake për të kapur apo ekzekutuar terroristët kishte persona me origjinë shqiptare. Me shume krenari e themi që ishte një shqiptare nga Kosova, heroina Doruntina Miroci. Prandaj mendova per t’i shkruar këto rreshta sepse jam i bindur që terrorrizmi nuk ka as komb dhe fe dhe s’ka maskë t’i mbulojë.
Kjo ngjarje i tregon dhe vërteton të gjitha: terroristi, viktima dhe heronjtë janë midis të gjithëve, ne jemi me viktimat dhe ata që luftojnë krimin, terroristët janë jashtë nesh, nuk kanë as kombësi dhe as fe.
Ky fenomen antinjerëzor dhe aspak fetar i terrorizmit i cili ka monstra të dhunshëm, kriminelë enigmatik, që nuk njohin ligje, asnjë etni, asnjë qeverisje, asnjë fe, asnjë qyteterim, mund të na sulmojnë me çmenduri befas të gjithë ne.
Kjo është arsyeja e fortë që duhet të na bashkojë edhe më paqja e përbashkët. Sepse një terrorist nuk nguron të vrasë edhe persona të kombësisë së tij dhe fesë së tij, siç ishte rasti i terroristit me origjinë shqiptare që bëri viktimë edhe një bashkekombas.
Shqipëria dhe shqiptarët janë në krah të luftës kundër terrorizmit, me botën e qytetëruar, aspirojmë për të qenë pjesë e BE-së dhe luftojmë si anëtar i vendeve të NATOS kundër çdo të keqeje që cënon paqen botërore. Rrënjët shqiptare kanë edhe figura të ndritura që kanë shërbyer njerezimit mbarë për paqen në botë ,siç është krenaria jonë kombëtare, e shenjta Nënë Tereza.
Edhe Skënderbeu ishte luftëtar i Evropës së kulturuar, kundër pushtimit dhe dhunës, që mbështillej dhe me fe. Le të kujtojmë shprehjen e sakte te italianit Gino Strada: “ Terrorizmi, pra lufta e ditëve tona, është përbindëshi i vërtetë që duhet eliminuar”.
la.mi/Fjala.al
