Kryetari i Partisë Demokratike, Lulzim Basha këmbëngul duke thënë se qeveria po fsheh numrin e viktimave që kanë ndërruar jetë si pasojë e Covid-19.
Në një postim në Facebook, teksa Basha publikon videon me deklaratën e tij të një dite më parë, thotë se ka për detyrë të thotë të vërtetën, ndërsa shprehet se Rama gënjen.
“Edi Rama po gënjen dhe po fsheh numrin e viktimave të COVID-19 në Shqipëri. Ne kemi detyrën të shpërndajmë të vërtetën në emër të jetëve të humbura”, shkruan Basha në Facebook.
Më herët kryeministri Rama e cilësoi deklaratën e kryedemokratit si të pashembullt, që cënon direkt mjekët, që ndodhen në vijën e parë të zjarrit.
Kjo akuzë, sipas Ramës, nxit dhunë kundër mjekëve. Për gjithë debatin, kreu i qeverisë thotë se do u drejtohet nesër shqiptarëve, sepse “Basha e kaloi cakun”.
“Për akuzën e pashembullt të Lulëzim Bashës, e cila cënon drejtpërdrejtë integritetin moral e profesional të mjekëve të vijës së zjarrit dhe nxit dhunë ndaj tyre, do t’u drejtohem nesër shqiptarëve me një mesazh të drejtpërdrejtë, sepse këtu është shkuar shumë shumë larg, përtej çdo caku të politikës së ulët ditore dhe këtu nuk është më fjala thjeshtë për llafet e një aktori të papërgjegjshëm!”, tha ndër të tjera kryeministri./Bl.Ba/Fjala.al