Kreu i Grupit Parlamentar të PS-së, Taulant Balla, nga foltorja e Kuvendit, ka sulmuar opozitën dhe kreun e PD-së, Lulzim Bashën, në lidhje me kritikat dhe akuzat për rindërtimin pas tërmetit dhe menaxhimin e epidemisë së COVID.
Balla tha se qeveria, veç dy tragjedive, është përballur edhe me “panikun e frikën të shkaktuar nga opozita”. Ai akuzoi Bashën se “po bën politikë me vdekjen dhe se “nuk ka kufij moral”.
Ndër të tjera Balla thotë se ato ditë do të mbahen mend gjatë në kujtesën e shqiptarëve. Ndërsa nuk la pa ironizuar edhe opozitën, që sipas tij tenton panikun.
“Do ti mbajmë mend gjatë ato ditë, si rrallë herë ato ditë kur shqiptarët u bënë. Ishte një moment i veçantë solidariteti edhe pse ndonjë hienë në krahun tjetër të politikes nuk e zgjati solidaritetin.
Shumë shpejt u përballëm edhe me kunjën e paskrupullt të hienave që tentuan të ngjallin mosbesim, tentuan të flasim për zi dhe për humbje shprese dhe që kulmoi në një shpërthim si ky i ditëve të fundit.
Politikanë të pashpresë, ushtarë të dëshpëruar të së keqes, njerëz të trembur deri në palcë nga efektet që sapo kanë filluar të reformës në drejtësi. Të gatshëm për të përdorur një fatkeqësi natyrore apo virusin për të nxitur ankth dhe panik dhe rrëmujë.
Përveç luftës me armikun e padukshëm po zhvillohet një betejë me panikun që po tenton të përhape Kasandra e opozitës rrugore. Basha i vetmi që u zgjua pas tërmetit me dy vila, sa herë gjendet në çadrat pas tërmetit flet me lot krokodili se gjoja qeveria i ka lënë në harresë, ndërsa me pandeminë kasandrat kanë shkuar në makabritet duke folur për numra në morgje apo duke abuzuar në TV.
Basha nuk ka as trup as moral qoftë në mënyrën e trajtimit të tërmetit apo solidarizimit që duhet të kemi në këtë pandemi. Të bësh politikë sot me vdekjen është një turp që Lulit nuk do ti harrohet kurrë”, tha Balla./Bl.Ba/Fjala.al
