Ndërkohë që shifrat e infektimeve të reja me Covid-19 javët e fundit kanë pësuar rritje të ndjeshme, nuk përjashtohet mundësia e shtimit të masave kufizuese. Në një intervistë për ‘Top Channel’, Shefi i Urgjencës Kombëtare, Skënder Brataj, kërkoi ndihmën e qytetarëve për mosezaurimin e skenarëve që çojnë drejt mbylljes.
“Këto numra që shohim sot, pas 3 javëve do të na shtohen pacientë me një përqindje më të lartë. Prandaj përgatitja e skenarëve është shumë e rëndësishme që të mos gjendemi të papërgatitur. Kemi nevojë për ndihmën e qytetarëve, patjetër. Çdo skenar do të vihet në dispozicion, por nuk duhet t’i ezaurojmë ato me një shpejtësi shumë të madhe,” –u shpreh Brataj.
Ai gjithashtu rekomandoi bërjen e vaksinës së gripit, pasi mund të ndikojë në uljen e rrezikut të infektimit me koronavirus. Brataj shpjegoi edhe njëherë ndryshimin e gripit me koronavirusin, pasi ndodh shpesh që të ngatërrohen shenjat, duket qenë se jemi në një periudhë virozash.
“Sado vaksina e gripit mund të jetë e ndryshme, mund të ndikojë në uljen e rrezikut nga Covid-19. Gripi ka një klinikë më të ndryshme nga Covid-19. Koronavirusi nuk ka shfaqje të shpejtë, siç ishte në fillimin e epidemisë, është më graduale, duke filluar me temperaturë subfebrile, me dhimbje, duke filluar me dhimbje fyti e kështu me radhë. Ndërsa gripi është më i shpejtë, zgjat më pak dhe ka shenjë tipike sekrecionet nga hunda.”
Sa i përket marrjes së masave kufizuese dhe a ekziston rreziku i një mbylljeje të dytë, Brataj u shpreh se mund të shkojmë drejt masave drastike si kufizimi i orareve, mbyllja e fundjavave e deri te mbyllja disa-javore.
“Duhet pritur efekti i masave që merren për të vendosur marrjen e masave të tjera. Normale që duhet të merren masa të tjera. Ne deri tani kemi thënë që kemi marrë masa të mesme, nga të mesme do të kalojmë në marrjen e masave më kufizuese, më drastike, që kanë të bëjnë me kufizim oraresh ose me mbylljen e fundjavave, ose një mbyllje disajavore, siç po bën gjithë bota, që për momentin nuk e kemi marrë në konsideratë, por që është një nga masat që ul në mënyrë drastike marrjen e infeksionit. E dimë shumë mirë që masa më e mirë është mbyllja, por duke marrë parasysh që me mbylljen ka një sërë problemesh të tjera, duhet të gjejmë një ekuilibër,” –përfundoi Brataj.
Aktualisht fasha orare kur ndalohet lëvizja e qytetarëve është 22:00 me 06:00./Bl.Ba/Fjala.al
