Dy persona janë vënë në prangat e policisë, pasi kanë tentuar të trafikonin bomba me telekombandë drejt Malit të Zi.
Pas një hetimi një mujor, në kuadër të operacionit policor “Distanca”, janë arrestuar në flagrancë shtetasit Erol Çiçi, 33 vjeç dhe Mariglen Gruda, 30 vjeç banues në Durrës (të dënuar më parë).
Këta shtetas u kapën në flagrancë në vendin e quajtur “Rrethrrotullimi i Shëngjinit”, në hyrje të qytetit të Lezhës.
Gjatë kontrollit të ushtruar nga policia, në çantën e shtetasit Mariglen Gruda, janë gjetur dy bomba me mekanizëm shpërthimi në distancë nëpërmjet aparatit telefonik celular, ku njëra ishte me lëndë të dyshuar plasëse e llojit tritol dhe tjetra me lëndë të dyshuar si plasëse e llojit dinamit, të cilat dyshohet se do t’i trafikonin në drejtim të Malit të Zi.
Materialet hetimore do t’i referohen Prokurorisë së Rrethit Gjyqësor Lezhë, për veprën penale “Trafikimi i lëndëve plasëse, djegëse, helmuese dhe radioaktive” kryer në bashkëpunim./Bl.Ba/Fjala.al
