Parku Kombëtar i Valbonës, në rrethin e Tropojës, prej tre ditësh është në errësirë të plotë për shkak të mungesës së energjisë elektrike, duke rrezikuar kështu seriozisht turizmin malor në këtë zonë.
Burime për Fjala.al thanë se errësira ka pllakosur gjithë pjesën malore, kurse reshjet e shumta të dëborës kanë arritur të mbulojnë gjithçka.
Të njëjtat burime treguan se autoritetet lokale dhe ato qëndrore deri më tani nuk kanë marrë asnjë masë për përmirësimin e situatës, kur në të njëjtën kohë po rrezikohen seriozisht dhjetra biznese në zonë.
Kujtojmë se Parku Kombëtar i Valbonës u mbulua nga dëbora në ditët e para të dhjetorit, duke ofruar një peizazh mahnitës jo vetëm për turistët vendas, por edhe ata të huaj.
Pavarësisht përmirësimit, vitet e fundit, të infrastrukturës rrugore dhe investimeve të vetë banorëve, në këtë pjesë të Alpeve shqiptare për këtë sezon dimëror po rrezikohet seriozisht turizmi malor, kjo si pasojë e ndërprejeve të vazhdueshme të energjisë elektrike.