Fundi i vitit është periudha më e bukur për shumë njerëz. Qyteti dekorohet dhe shohim vetëm drita dhe pemë gjithandej. Çdo gjë duket sikur merr një pamje tjetër. Në këtë periudhë mundohemi të mos mendojmë për punën apo streset e përditshmërisë, por të fokusohemi te gjërat qe na bëjnë të lumtur, siç janë dhuratat apo festat që do kalojmë pranë njerëzve tanë të dashur. Por, çfarë ndodh kur festat mbarojnë dhe na duhet t’i kthehemi rutinës sonë? Rikthimi në përditshmëri pas festave te shumë njerëz shoqërohet me stres. Po ashtu, rikthimi në punë nuk është aq i thjeshtë pas festave dhe ca ditëve pushim. Më poshtë po ju japim disa këshilla se çfarë duhet të bëni për të menaxhuar stresin pas festave.
Jepini vetes të paktën një ditë kohë para se të riktheheni në punë
E keni parasysh shprehjen “Më duhet pushim pas pushimeve”? Kjo është pikërisht ajo që ju duhet për të shmangur stresin. Jepini vetes pak kohë pas festave për t’u kthyer në normalitet. Merruni pak me shtëpinë dhe dalëngadalë rikthehuni në rutinën e përditshmërisë, por duke gjetur kohën për t`u relaksuar. Kjo gjë do ta bejë rikthimin në punë më pak stresues.
Mos e mbingarkoni veten me punë
Bëjeni rikthimin në punë sa më të thjeshtë për veten tuaj. Mos u zhysni në punë. Merruni vetëm me gjërat me urgjente, të paktën javën e parë. Bëjni gjërat me radhë, kështu do të jeni edhe më frytdhënës në punën tuaj.
Mos e anashkaloni argëtimin
Stresi pas pushimeve mund të jetë i zakonshëm nëse i përvisheni menjëherë punës dhe harroni gjërat që ju argëtojnë. Mundohuni që të mos i anashkaloni gjërat që ju bëjnë të ndiheni mirë. Dilni me miqtë, bëni një shëtitje, shikoni serialet tuaja të preferuara, bëni çdo ditë diçka që do t’ju bëjë të ndiheni mirë. Kjo do të ndikojë pozitivisht në gjendjen tuaj shpirtërore dhe do të ndiheni energjikë dhe të lumtur edhe pse festat dhe pushimet kanë mbaruar./Bl.Ba/Fjala.al
