Dy vajzat e mitura që rezultuan të humbura prej datës 1 janar, janë gjetur në Përmet.
Të miturat e larguara nga banesat e tyre më 1 janar dhe nuk janë kthyer më janë Mojna Hajdaraj dhe Kejsi Ahmetaj, të moshës 16-vjeçare, shoqe me njëra-tjetrën.
Policia e Tiranës njofton se dy mikeshat, të cilat ishin larguar pa adresë nga shtëpitë e tyre, janë në gjendje të mirë shëndetësore dhe ndodhen për momentin në komisariatin e Policisë së Përmetit.
“Si rezultat e kontrolleve të vazhdueshme nga DVP Tiranë, në bashkëpunim me Komisariatin e Policisë Sarandë dhe Komisariatin e Policisë Përmet, paraditen e sotme u bë e mundur gjetja e dy vajzave të mitura që janë larguar nga banesa më datë 01.01.2021.
Vajzat janë në gjendje të mirë shëndetësore dhe ndodhen në Komisariatin e Policisë Përmet, ku do të merren nga shërbimet e DVP Tiranë dhe do të dërgohen nëpër banesat përkatëse”, – thuhet në njoftimin e policisë.
Ato ishin larguar nga banesat e tyre ditën e parë të vitit të ri, me pretendimin se do takonin njëra-tjetrën. Familjarët ditën tjetër denoncuan zhdukjen e tyre në polici./Bl.Ba/Fjala.al