Kryeministri Rama ka premtuar dëmshpërblim për të përmbyturit një javë më parë kryesisht në qarqet Shkodër dhe Lezhë. Kreu i qeverisë komentoi se asnjë deputet nuk do të bëjë vaksinën nëse nuk është mbi 75 vjeç.
Nga Fernada Cenko
Kryeministri Edi Rama ka konfirmuar për banorët e prekur nga përmbytjet e këtyre ditëve të fundit se shteti do të kompensojë të gjitha dëmet e shkaktuara. Gjatë një konference për mediat lidhur me situatën në fjalë, teksa ka bërë një bilanc të dëmeve ai tha se do t’i kompensojë, siç ka bërë dhe në rastin e vitit 2010.
“Numri i banesave të dëmtuara është krejt minimal, dhe i takon bashkive që të bëjnë vlerësime. Në zonën e Obotit, ku ka pasur problematikë, për transportin për bagëtitë, është garantuar ushqimi nga ministria e Bujqësisë dhe i është kaluar menjëherë fermerëve per të ushqyer bagëtitë për 10 ditë. Pjesa më e madhe e tokave të përmbytura këtë herë janë jo produktive. Nuk ka dëme të konsiderueshme, por çdo dëm që ligjërisht duhet kompensuar, do i bëjmë. Kemi kompensuar dhe dëmet e 2010-ës.”, tha Rama.
Përgjigja për Bashën
Kryeministri Edi Rama i është kundërpërgjigjur edhe kryetarit të PD-së, Lulzim Basha pas akuzave që ky i fundit bëri për situatën e shkaktuar nga përmbytjet. Përmes një postimi në ‘Twitter’, kreu i qeverisë bëri ironi me Bashën, ndërsa theksoi se bashkë me ish-kryeministrin Berisha, Metën, dhe kryetaren e LSI- së, “duan ta bëjnë kamardare edhe tërmetin, edhe virusin, edhe shiun, edhe borën, madje edhe Nusretin bashkë me Tiren, i duan për kamardare”.
Maska e Ramës
Kryeministri Edi Rama gjatë një konference për gazetarët ka sqaruar se maskat që ai mban për t’u mbrojtur nga koronavirusi nuk janë me logon e Partisë Socialiste. Ndonëse ato kanë të stampuara inicialet PS, duke u karakterizuar nga ngjyrat e ndezura, kreu i qeverisë, tha se ato janë gërma dhe lule të dashura për të.
“Kjo është maska ime, nuk është logo e PS. Janë germa dhe lule të dashura për mua dhe yje që janë po ashtu pjesë e figurave që më intrigojnë. Lexojeni si të doni. Janë dy gërma që dikush i lexon PS, dikush ndryshe. Nuk është logo e PS-së.”, tha Rama.
Vaksina për deputetët
Kryeministri Edi Rama është treguar i prerë sa i takon një kërkese të kreut të komisionit të Shëndetësisë, Enver Roshi, që deputetët të jenë pjesë e grupit të privilegjuar për të bërë vaksinën anti-covid. Sipas Ramës, asnjë deputet apo ministër, që nuk është mbi 75-vjeç, nuk do të ketë asnjë privilegj të kësaj natyre. “Asnjë ministër, asnjë deputet, asnjë drejtor, që nuk është mbi 75 vjeç nuk do të ketë asnjë privilegj të kësaj natyre.”, tha Rama.
