Një javë më parë, pranë Ambasadës Italiane, përballë TVSH, dy makina u përplasën në një aksident të frikshëm rrugor. Ngjarja ishte tepër e rëndë, pasi 2 kalimtarë të rastit shpëtuan për më pak se 1 sekond nga vdekja e sigurtë. Aksidenti u shkaktua nga një makinë e tipit BMË, version 750 LI, e cila me një shpejtësi mbi 150 km/orë hyri me të kuqe dhe përplasi një makinë Skoda. Kjo e fundit po vinte nga rruga e Liceut Artistik në drejtim të Kryeministrisë.
Në media u fol se shoferi i BMW-së që shkaktoi aksidentin, Stiverjan Dashi, ishte i afërm i një zyrtari të lartë në Policinë e Shtetit, dhe është favorizuar nga forcat e policisë në marrjen e masave ndaj tij.
Por sot policia, përmes një njoftimi i ka mohuar këto pretendime. Në njoftim thuhet se në lidhje me këtë ngjarje janë kryer të gjitha veprimet procedurale dhe materialet janë referuar në Prokurori në ngarkim të autorit të aksidentit. Njëkohësisht, Policia Rrugore e Tiranës ka kryer të gjitha veprimet administrative.
Në lidhje me lajmin e publikuar në disa media përgjatë ditëve të fundit, për një aksident rrugor të ndodhur në kryqëzimin e rrugës “Papa Gjon Pali II” me rrugën “Ismail Qemali”, ku shtetasi S.D., duke vazhduar lëvizjen me mjet gjatë kohës që semafori ishte me dritë të kuqe dhe është përplasur me mjetin tip “Skoda Rapid”, me drejtues shtetasin D.T. dhe pasagjer shtetasin A.M. e për pasojë u dëmtuan 2 shtetas, jashtë rrezikut për jetën, sqarojmë opinion publik se: Drejtuesi i mjetit që shkaktoi aksidentin rrugor nuk është i afërm i ndonjë zyrtari drejtues në Policinë e Shtetit dhe nuk është favorizuar në asnjë moment nga asnjë zyrtar policie. Strukturat hetimore të Drejtorisë Vendore të Policisë Tiranë, në lidhje me këtë ngjarje kanë kryer të gjitha veprimet procedurale dhe materialet janë referuar në Prokurori për veprime të mëtejshme, në ngarkim të qytetarit S.D. Njëkohësisht, Policia Rrugore e Tiranës ka kryer të gjitha veprimet administrative. Njoftimi për aksidentin rrugor është pasqyruar në faqen zyrtare të Policisë së Shtetit, në përmbledhjen ditore të ngjarjeve që publikohet, si çdo ngjarje tjetër pa pasoja fatale.