Një tjetër çështje e diskutueshme dhe e debatueshme në Shqipëri është mungesa e sindikateve. Juristi Artan Manushaqe e shikon këtë si një ngërç për mënyrën se si përballet një punonjës në raport me shtetin. Gjatë intervistës me gazetarin Roland Qafoku, Manushaqe tha se në vende të ndryshme evropiane janë sindikatat ato që diktojnë te qeveria dhe jo anasjelltas. Ndërkohë sipas Manushaqes, rasti më tipik është sindikata e fermerëve në Greqi në të cilin ata arrijnë të bllkokojnë komunikacionin në rast kur tregojnë forcën e tyre.
-A e shikoni si problem mungesën e sindikatave në Shqipëri?
-Shumë problem i madh është. Unë mendoj që sindikatat në Shqipëri janë struktura formale pa përmbajtje. Kanë disa zyra, marrin disa pagesa.
-Ku i gjejnë fondet për pagesat?
-Disa i marrin nga kuotat e përfaqësuesve që kontribuojnë për sindikatat, dhe fonde nga burime të tjera që duhen verifikuar, dhe të gjitha këto janë pjesë e transparencës. E mira është që ndonjëherë të marrësh shembuj. Shikoni sindikatën e bujqërve në Greqi. Kur ngrihen ata përshembull në zonën e Patrës ose në zonën e Artës, dalin bllokojnë rrugën, paralizojnë institucionet shtetërore. Do të thotë që ky grupim organizativ shoqëror për një sector të caktuar funksionon, është i pavarur, i pakapur. Te ne, unë mendoj që sindikatat një pjesë është e kapur, por një pjesë nuk ka efikasitetin e duhur. Se sindikatat në fund të fundit duhet të kenë fytyra të reja gjithmonë. Duhet të riciklohen. Nuk mund të shikoj të njëjtat fytyra gjithmonë në 30 vjet. Edhe unë ndonjëherë vras mendjen, çfarë produkti ka sjellë ndër vite një sindikatë. Unë nuk shoh ndonjë gjë të prekshme./Fjala.al/Ke.Ba
