Kongresmeni amerikan, Stephen Lynch rezultoi pozitiv me COVID-19 edhe pas marrjes së dy dozave të vaksinës kundër virusit.
Sipas mediave amerikane, këtë e ka bërë të ditur zëdhënësja e kongresmenit e cila tha se aktualisht ai nuk ka shenja të rënda.
“F. Lynch rezultoi pozitiv, pasi një anëtar i stafit në zyrën e kongresmenit në Boston kishte rezultuar pozitiv në fillim të javës. Lynch, i cili synon të votojë me prokurë në Kongres javën e ardhshme, mori dozën e tij të dytë të Pfizerit dhe u testua negativ për sëmundjen, para se Biden të betohej më 20 janar”, tha zëdhënësja Molly Rose Tarpey.
Ajo nuk dha detaje kur kongresmeni mori secilën nga dozat e vaksinës. Disa Demokratë të Dhomës së Përfaqësuesve rezultuan pozitivë me COVID-19 më herët në janar pasi kaluan kohë në bllokim me anëtarët republikanë të cilët refuzuan të mbanin maska gjatë sulmit në Kapitol më 6 janar.
Ky është një rast i rrallë i infektimit edhe pas marrjes së dozës së dytë të vaksinës. Kujtojmë se në vendin tonë mjeku Pëllumb Pipero rezultoi pozitiv me COVID pas marrjes së dozës së parë të koronavirusit. Por sipas mjekëve, kjo është mëse normale duke deklaruar se trupi i njeriut krijon mbrojtjen ndaj koronavirusit brenda 30 ditëve të marrjes së dy dozave të vaksinave.