Në takimin e zhvilluar në Zall-Herr, Rama nuk ia kursyer ironitë me rivalin e tij politik, kryedemokratin Lulzim Basha.
“Fëmijët shkojnë sot në shkollat më të bukura të Shqipërisë. Po kthehet për mirë. Mirë tërmeti e mirë COVID, por se lënë as mizat gamorin e shkretë. Po i thoja atij në Durrës që e imagjinon që gjysmë ore pas tërmetit të vijë Luli këtu. Luli është gjumë. Do veshë këpucët, do bëjë flokët me xhel ka ardhur dreka Pastaj do hajë drekë e do dalë pak në televizor”, tha Rama.
Gjatë bashkëbisedimet me banorët që kishin hyrë në shtëpinë e re, të rindërtuar nga tërmeti i 26 nëntorit, Rama bëri të ditur se pse e kërkon mandatin e tretë qeverisës. Ai tha se mandati i tretë i duhet PS për të vazhduar betejat që ka nisur me procesin e rindërtimit, pandeminë, vaksinimin.
“Të marrësh të bësh triko duke shkepur e duke qepur është më e vështirë se të nisësh nga fillimi. Se thonë pse e doni mandatin e tretë. Mandatin e tretë e duam për të vazhduar betejat që kemi nisur, me pandeminë me infektimet. Betejën me shëndetësinë që ta bëjmë si duhet në të gjitha drejtimet.
Fshatrat kanë nevojë për punë shumë. Ka fshatra që janë pak larg dhe kanë nevojë për punë. Për të gjitha këto arsye do vazhdojmë punën. Rëndësi ka që çfarë vjen për keq, ta kthesh për mirë. Tërmeti erdhi për keq, dhe për ju u kthyer për mirë. Se tani keni një shtëpi që nuk do e kishit bërë dot kurrë vetë”, u shpreh Rama.
