Në kuadër të 101-vjetorit të Tiranës kryeqytet, në mjediset e kalasë së Tiranës janë ekspozuar për publikun 60 fotografi të vjetra nga AQSH, kartolina, objekte autentike nga koleksionistët dhe elementë të veshjeve tiranase.
Në çeljen e ekspozitës “Historia e Tiranës së vjetër përmes fotografive” të pranishëm ishin drejtori i përgjithshëm i Arkivave, Ardit Bido; zv/kryetari i bashkisë Tiranë, Andi Seferi; Klodiana Toptani, administratore e Kalasë; Mirela Bogdani, kryetare e Shoq. Tirana Intellectum.
Drejtori i përgjithshëm i Arkivave, Ardit Bido, theksoi rëndësinë e datave të tilla për të treguar edhe çfarë ruhet në fondet arkivore, si një moment me rëndësi për kujtesën.
“101-vjetorin e Tiranës vendosëm ta kremtonim përmes kësaj ekspozite ku shfaqen imazhet e vjetra të kryeqytetit, para vitit 1945. Këtu tregohet një pjesë e historisë së tij, me ndërtesat historike me funksion publik, banesat e Tiranës, ngjarje dhe personazhe”, u shpreh Bido.
Ekspozita do të qëndrojë e hapur për disa ditë në Kalanë e Tiranës, në hapësirën publike të ekspozitave për cilindo që dëshiron të shohë Tiranën siç ka qenë, përmes fotografive por edhe objekteve autentike.
