Policia e Tiranës ka vënë në pranga Kataldo Kuliçin, i cili ka shantazhuar ish të dashurën se do të publikonte një video intime të saj, në këmbim të 5000 eurove.
Kjo ishte hera e dytë që ai kërkonte para nga ish-partnerja e tij. Vajza vendosi që ta denonconte në Polici, pasi herën e parë që Kuliçi kishte kërkuar para, ajo i kishte dhënë 3 mijë euro.
24-vjeçari jetonte më së shumti në Britani të Madhe dhe mësohet se edhe atje ka qenë i proceduar penalisht për vjedhje.
“Në vijim të punës për kapjen e personave në kërkim dhe vënien e tyre përpara përgjegjësisë penale, specialistët për Hetimin e Krimit në Komisariatin e Policisë Nr. 2 bënë kapjen dhe ndalimin e shtetasit K. K., 24 vjeç, i shpallur në kërkim për veprën penale “Shtrëngimi me anë të kanosjes ose dhunës për dhënien e pasurisë”, pasi nëpërmjet rrjeteve sociale ka kanosur një shtetase, duke e shtrënguar për dhënie pasurie”, thuhet në njoftimin e policisë.
