Gjykata e Tiranës ka dhënë masën e sigurisë ”arrest shtëpie” për 24-vjeçarin Leonard Berisha, i cili dyshohet se dhunoi mjekun e QSUT-së Petrit Gjorgji, pasi sipas tij po i rrihte gjyshin.
Berisha është shprehur në Gjykatë: Mjeku po më rrihte gjyshin, reagova. Jam jetim, jam rritur me gjyshin. Vetëm gjyshërit kam, ai është 80-vjeç. Jam shumë i penduar, por po më rrihte gjyshin.
Duke marrë parasysh dhe pendimin e të riut, Gjykata ka vendosur ndaj tij masën e arrestit të shtëpisë, ndërkohë që vetë mjeku Gjorgji dha një tjetër version për ngjarjen.
“Kishim një pacient për veshkat. Në një moment ka rënë nga krevati dhe me ndihmën e kolegëve të tjerë kemi shkuar për ta ndihmuar. Për ta ngritur, unë e kapa jo të gjithë trupin, por nga këmbë, për shkak të pozicionit dhe e vendosëm sërish në krevat.
Një i afërm, që nuk po i shërbente e pa dhe ka ardhur më ka goditur nga pas. Ndërhynë mjekët dhe infermierët. Denoncova dhe erdhi policia që e ka marrë”, u shpreh mjeku të shtunën pas ngjarjes.
Gjorgji rrëfeu më tej se dhuna ndaj tij ishte e përsëritut, dhe kjo nuk mund të ndodhë me bluzat e bardha.
“Është rast i përsëritur për mua. Më ka ndodhur edhe në vitin 2004. Kjo nuk mund të ndodhë me bluzat e bardha. Unë do e ndjek çështjen, duhet të bëhet drejtësi”, u shpreh mjeku.