Skuadra e tij ka spikatur, edhe pse ka ardhur nga niveli i dytë në atë të parin e Kampionatit Kombëtar të Futbollit, por rrugëtimi në këto 21 javë të deritanishme të Kategorisë Superiore ka qenë i karakterizuar nga luhatjet. Kastrioti përballet të mërkurën me Skënderbeun në fushë të hua dhe trajneri Ramazan Ndreu ishte i qartë kur u pyet të martën në lidhje me objektivin për këtë ndeshje.
“Skënderbeu është një kundërshtar mjaft i vështirë dhe e ka ndeshjen e jetës, kështu që edhe ne na del për detyrë që të japim më të mirën dhe të marrim 3 pikët, – ka thënë ai. – Me këtë objektiv do të shkojmë në Korçë. Kampionati është shumë i fortë dhe gara sa vjen e ashpërsohet me kalimin e ndeshje. Kampionati është ndarë në dy grupe.”
“Ka skuadra që luftojnë për mbijetesën dhe janë më shumë se gjysma që duan zonën e UEFA-s, – ka vijuar kreu i stolit krutan. – Të gjitha këto skuadra e kanë rritur nivelin dhe është shumë e vështirë t’i përballosh. Megjithatë, siç theksova më lart, shkojmë në Korçë me këto djem për të marrë maksimumin dhe kam besim te grupi i lojtarëve.”
Megjithatë, Ndreun e bren një merak para këtij dueli, për shkak se Skënderbeu u penalizua në Ballsh. Teoria e kompensimit është ajo që e tremb Ndreun, që thotë: “Deri tani gjykimi ka qenë shumë i mirë dhe shpresoj që të vazhdojë kështu. Ajo që doja të thosha unë, duke marrë shkas nga disa gjëra të vogla që ndodhën javën e shkuar, është që gjyqtarët mos të kompensojnë, duke pasur parasysh përvojën e viteve të shkuara.”
“Në momentin që një ekipi i kanë ngrënë diçka, kërkojnë që t’ia kompensojnë në ndeshjen e radhës. Kërkoj nga sektori i gjykimit që të vazhdojë punën e mirë që ka bërë deri më tani”, – ka përfunduar apelin e tij trajneri i Kastriotit, Ramadan Ndreu.
