Shqipëria ka siguruar edhe 50 mijë vaksina të tjera kundër koronavirusit. Lajmi i mirë u dha nga kryeministri Edi Rama, i cili shkruan se këto 50 mijë vaksina të Astrazeneca janë siguruar jashtë marrëveshjeve të deritanishme.
“Sapo kemi siguruar 50 mijë vaksina të tjera Astrazeneca jashtë marrëveshjeve të deritanishme”, shkruan Rama.
Më herët gjatë ditës, ministrja Manastirliu njoftoi për mbërritjen e 20 mijë vaksinave nga Pfizer brenda muajit prill.
Prej disa ditësh vendi ynë ka nisur vaksinimin masiv, ndërsa qeveria është optimiste se brenda verës do ketë lehtësim të masave.
Vaksinimi masiv nisi pas mbërritjes së 192 mijë vaksinave kineze Sinovac, nga 1 milion që ka siguruar qeveria shqiptare.
Shqipëria ka zyrtarisht 124 723 raste të konfirmuara me koronavirus, prej të cilave 90 617 janë të shëruar, ndërsa 31 879 aktivë. Numri i viktimave që nga nisja e pandemisë është zyrtarisht 2227. /Gazeta SHQIP
