Nga Fernada Cenko
Gazetarët e terrenit dhe efektivët e policisë do të jenë dy kategoritë që do të marrin vaksinën sot e në vazhdim. Këtë lajm e dha kryeministri Edi Rama së bashku me ministren e Shëndetësisë Ogerta Manasterliu teksa ka folur për vaksinimin. “Nga sot (dje) në drekë nis vaksinimi i gazetarëve të terrenit dhe operatorët, nesër do të nisë vaksinimi i punonjësve të policisë, fillojmë me Tiranën dhe pastaj do të shtrihemi në të gjithë Shqipërinë”, tha ministrja. Ndërkohë, nga ana e tij, kryeministri Edi Rama iu bëri thirrje qytetarëve të mos i tremben vaksinës kineze, pasi sipas tij, është super e suksesshme dhe që po përdoret nga të gjitha kurorat mbretërore të vendeve të Lindjes së Mesme. “Të mos bjerë askush viktimë e kukuvajkave. Vaksina Sinovac është super e suksesshme, është vaksina që kanë preferuar vendet e pasura të Lindjes së Mesme dhe gjithë kurorat mbretërore të asaj zone kanë marrë këtë vaksinë. Fakti që nuk ka hyrë në BE nuk ka lidhje me eficencën e vaksinës, por ka lidhje me çështje të një natyre tjetër, që ne nuk na interesojnë”, tha kreu i Qeverisë. Rama kërkoi bashkëpunim me qytetarët për të nxjerrë urgjent popullin shqiptar. “Neve na intereson të nxjerrim urgjent nga tuneli popullin shqiptar dhe të nxjerrim sa më shpejt nga gjithë kjo kohë e gjatë ankthi e pasigurie gjyshërit e gjyshet, ata me sëmundje kronike, e gjithë popullsinë. Nesër fillojmë me policët, do të bëjmë siç është plani edhe për gazetarët. Po bëjmë gati edhe shërbimet hoteliere për sezonin turistik, si dhe për të gjithë punonjësit e fabrikave”, tha Rama. Ndërsa në “Facebook”, kryeministri Edi Rama ka dhënë lajmin se brenda javëve të prillit do të vijnë edhe 23 mijë doza të tjera vaksine nga Pfizer. Kreu i qeverisë thotë se sezoni turistik do të lehtësohet ndërsa Shqipëria së shpejti do të kalojë në vendet me volum të lartë të vaksinimit në Europë. “Lajm i mirë. Brenda javëve të Prillit edhe 23 mijë doza të tjera Pfizer. Ne do ta lehtësojmë sezonin turistik me se s’bën; do të ngjitemi shumë shpejt në shkallët e larta të klasifikimit në Europë, për volumin e vaksinimit; do ta nxjerrim jashtë Armikun e Padukshëm më shpejt se shumë të tjerë në kontinentin tonë”, shprehet Rama. Të dielën në Shqipëri nisi vaksinimi masiv. Në vendin tonë kanë hyrë 4 lloje të ndryshme vaksinash kundër koronavirusit Pfizer, AstraZeneca, Sputnik V dhe Coronavac.
