Nga Fernada Cenko
Nuk ka më dilema. Ankthi njëmujor i fushatës, shpesh të ndezur e fatkeqësisht edhe me një viktimë dhe disa të plagosur mori fund, por fundi vendosi vijimësinë e pushtetit, duke bërë Edi Ramën liderin e parë në 30 vite pluralizëm politik që merr tre mandate radhazi. Vota u lexua nga kutitë e votimit, duke i dhënë PS-së 74 mandate, PD-së 59, LSI-së 4 dhe PSD-së 3. Ky konfigurim i jep Ramës të drejtën e qeverisjes pa pasur nevojë koalicionesh, por nga ana tjetër kemi edhe një opozitë të fortë, të paktën nga numrat, siç është rasti i PD-së. Nëse do të kërkohet dështim total ajo është LSI, ndërsa sukses absolut, të paktën për nga numri i mandateve dhe votat e siguruara është PSD e Tom Doshit. Kohë për të shijuar vetëm fitore pa aksion apo aksiomë politike, duket se nuk do të ketë… Edhe pse ende nuk është zyrtarizuar Parlamenti i ri, apo edhe qeveria nëse do të ketë ndryshime, kryeministri punën e fundit që do të bëjë me Parlamentin e vjetër do të jetë shkarkimi i Presidentit Ilir Meta me pretendimin se ka shkelur Kushtetutën para dhe gjatë fushatës elektorale.
Ndërkohë që nga kampi mazhoritar po “vlon” shkarkimi i Presidentit, Partia Demokartike ka një hall tjetër. Zërat kundër Bashës, kërkojnë dorëheqjen e tij nga posti i drejtuesit të partisë, me pretendimin se për tetë vite nuk mundi dot ta sjell PD në pushtet dhe në katër zgjedhje radhazi të përgjithshme dhe lokale, ai ka njohur vetëm dështime. Vëtë Lulzim Basha nuk e quajti dështim humbjen e PD në këto zgjedhje, pikërisht për të legjitimuar qëndrimin e tij në krye të PD, po kërkon rimëkëmbjen për në zgjedhjet e ardhshme. A do të pranojë Basha të kapë dorën e shtrirë nga Rama për një bashkëqeverisje në të mirë të vendit? Kryeministri Edi Rama ende nuk ka thënë se ku konsiston kjo bashkëpunim i gjerë, por ende është herët për të folur nëse Basha do të pranojë këtë trampolinë të ofruar nga Rama apo jo. Në intervistë ekskluzive për gazetën “Fjala” lidhur me këto çështje kanë komentuar analistët Leonard Karaj, Frrok Çupi, Alfred Lela si dhe Plator Nesturi.