Ditën e diel, më 23 maj, do të mbahet një marshim në sheshin Skënderbej në orën 13:30. “Mos ma vrit fëmijërinë” është tema e këtij marshimi, i cili vjen pas ngjarjes së rëndë të ndodhur në fshatin Tarazh të Mirditës, ku një vajzë 15-vjeçare është përdhunuar në grup nga 5 persona.
Denoncimin e ka bërë vajza me familjarët e saj në polici e më pas Artan Kaçorri 31 vjeç, Albert Molla 27 vjeç, Ermal Tarazhi 30 vjeç, Nike Lleshi 44 vjeç dhe Adrian Gjikola 17 vjeç janë arrestuar.
Gazetarja e njohur u shpreh se jemi të gjithë fajtorë për këto ngjarje të tmerrshme që ndodhin në vendin tonë.
“1 fëmijë përdhunohet çdo 5 ditë në Shqipëri. Janë të dhëna që i ka postuar agjencia Shtetërorë për Mbrojtjen e Fëmijëve, që thonë se përdhunuesit janë të afërm apo dhe komshija. Ndihem e tronditur, pyetja e parë që i bëj vetes është sa kohë i duhet vajzës të rikuperohet? Sa mund të na mbrojë shteti apo ne?”, tha Lekatari.
E pyetur se çfarë nuk funksionin në shoqërinë tonë që ka kaq shumë ngjarje tronditëse, gazetarja tha se “nuk funksionon shkolla, shteti dhe familja”.
“Të gjithë jemi fajtorë. Ne themi ‘kështu është familja shqiptare’, por e kemi ne detyrë që të ndryshojmë, të informojmë. Duke ngritur zërin, duke reaguar. Ka një rritje të dëshirës së familjarëve për tu shkuar deri në fund rasteve të tilla. Por në vendin tonë viktima përdhunohet dy herë, një herë me ngjarjen e pastaj me mosmbështetjen dhe paragjykimin që i bëjmë”, tha Lekatari.
Sipas saj, shoqëria shqiptare është në një krizë shumë të madhe, e kjo largohet vetëm nëse të gjithë faktorët bashkëpunojnë, që nga shteti deri te qytetarët.