Abuzimet me çmimet nga restorantet gjatë sezonit turistik denoncohen ço vit. Një rast të tillë e ka denoncuar sot edhe zv.kryeministri Erion Braçe. Ai publikon një faturë të një restoranti në rrjete sociale, ku totali i pagesës është një shumë jo e vogël, 347.50 lekë të vjetra.
Në faturë vihet re se qytetarët kanë konsumuar edhe dater, një lloj midhje e ndaluar me ligj tregtimi i saj në vendin tonë. Gjithashtu edhe çmimi i një kilogram levreku është 50 mijë lekë, dhe Braçe thekson se kjo nuk kushtoin askund kaq shumë. Zv. kryeministri bën thirrje që të mos abuzohet me çmimet, pasi si pasojë numri i turistëve do të jetë i pakët.
“Mos e nisni me kemben e gabuar; Domethene me faturen e gabuar! 1. Dateri eshte e ndaluar te tregtohet ne kete vend; 2. Nje levrek nuk kushton kerkund 50.000 leke; 3. Ky TIGANI nuk ka kater kilogram levrek, as 200 mije leke shije; 4. Kjo fatura nuk njihet nga legjislacioni fiskal ne kete vend, por trajtohet nga ligji si e paligjshme. E thjeshte; Mos i perzini njerezit! Ja fitove sot 200 mije leke nga kjo fature! Neser nuk te vjen me kush”, shkruan Braçe.
