Guvernatori i Bankës së Shqipërisë, Genti Sejko u takua me përfaqësuesin e ri të Bankës Botërore në Shqipëri, Emanuel Salinas. Ky i fundit nis detyrën në 1 korrik dhe zëvendëson drejtoren aktuale Maryam Salim.
Gurvernatori Sejko njohu përfaqësuesin e bankës me ecurinë ekonomike, post pandemi, masat e marra si dhe pritshmëritë për ecurinë e mëtejshme.
BB i ka ofruar asistencë Bankës së Shqipërisë kryesisht në fushën e mbikqyrjes bankare, sistemit të pagesave si dhe ndërhyrjes së jashtëzakonshme.
Fillimisht, Guvernatori Sejko i drejtoi një falënderim të veçantë për Salim, për kontributin e dhënë gjatë këtyre viteve dhe disa iniciativave specifike të ndërmarra në fushat e reformimeve programore dhe politike.
Përfaqësuesit e BB-së vlerësuan pozitivisht politikën e ndjekur nga Banka e Shqipërisë në përgjigje të situatës së krijuar nga COVID-19, si dhe për kontributin e saj në reduktimin e kredive me probleme, në përmirësimin e ambientit të kreditimit e kuadrit mbikëqyrës e rregullator, dhe përafrimin e tij me standardet më të mira ndërkombëtare.
Më në veçanti u vlerësuan politika e Bankës së Shqipërisë për ruajtjen e stabilitetit financiar të vendit dhe shëndetit të bankave, pavarësisht sfidave dhe vështirësive me të cilat u përball Shqipëria gjatë periudhës së pandemisë dhe më herët.
Nga ana e tij, Salinas u shpreh se do të angazhohet që programet e asistencës teknike dhe thellimi i mëtejshëm i bashkëpunimit ndërinstitucional të vijojnë të zbatohen me sukses edhe gjatë mandatit të tij.
Në përfundim, bashkëbiseduesit diskutuan mbi projektet e ardhshme të Bankës së Shqipërisë, të cilat mund të mbështeten nëpërmjet asistencës teknike të ofruar nga Banka Botërore.
Emanuel Salinas i është bashkuar BB-së në vitin 2005 dhe pasi ka përfunduar me sukses misionet në Bosnje Hercegovinë dhe Mal të Zi, do të fillojë nga detyra në Shqipëri, nga data 1 korrik 2021.
