5-vjetori i miratimit me 140 vota në Parlament i reformës në drejtësi e gjen sistemin ende me problematika dhe sfida të mëdha, por me të gjitha hallkat e tij e tij funksionale, që nga Gjykata Kushtetuese, që po merr vendime e deri te SPAK, që po godasin korrupsionin dhe krimin e organizuar dhe deri te Inspektoriati i Lartë i Drejtësisë.
Një prej shtyllave të këtij procesi ka qenë vettingu. Dhjetra gjyqtarë e prokurorë u dorëhoqën nga sistemi ende pa hyrë në fuqi ligji, të tjerë u dorëhoqën para se t’u vinte radha për të dhënë llogari në kriteret e profesionalizmit, integritetit dhe pasurisë dhe të tjerë që u shkarkuan nga trupat e rivlerësimit.
Bilanci i vettingut nga Komisioni i Pavarur i Kualifikimit, që është shkalla e parë e këtij procesi është 421 vendime në total, prej të cilave 174 janë konfirmime në detyrë, 155 janë vendime shkarkimi nga detyra, 56 janë vendime kur procesi është ndërprerë për shkak të dorëheqjes së subjekteve të rivlerësimit, 8 vendime për pushim dhe 25 raste pa vendim përfundimtar dhe tre vendime për pezullimin nga detyra për 1 vit.
Gjysma e çështjeve të shqyrtuara nga KPK janë apeluar në Kolegjin e Posaçëm të Apelimit, ose prej Komisionerit Publik me rekomandim të ONM-së, ose prej vetë subjekteve të rivlerësimit që kanë kundërshtuar vendimin e shkarkimit nga KPK.
KPA ka përfunduar shqyrtimin për 109 prej këtyre çështjeve. Në 79 raste është lënë në fuqi vendimi i KPK-së, në 17 raste ka rrëzuar vendimin e KPK-së dhe ka shkarkuar subjektet e rivlerësimit dhe vetëm në tre raste ka ndryshuar vendimin e KPK-së duke konfirmuar në detyrë të subjekteve të rivlerësimit.
Vendimi i parë i marrë nga Vettingu ishte më 23 mars të 2018-s dhe ai shkarkoi Fatos Lulon, që nuk justifikoi pasurinë. Me arsyetimin e mosjustifikimit të pasurisë janë shkarkuar mbi 90 për qind e gjyqtarëve dhe prokurorëve deri më tani./ GSH
