Kreu i Partisë Demokratike Lulzim Basha ka reaguar për herë të parë pas fjalës së kryeministrit Edi Rama në Asamblenë e PS, ku prezantoi edhe qeverinë e re për mandatin e tretë. Basha ka publikuar raportin e OSBE/ODIHR, duke thënë se ky raport do të shërbejë si udhërrëfyesi i opozitës për aksionet politike. Basha ripërsërit akuzat ndaj qeverisë për blerje, vjedhje votash, presione mbi administratën etj. “Shkatërruesi i bashkëjetesës demokratike, ortaku i tomdoshëve dhe aqifrakipëve, autori i kapjes dhe kriminalizimit të shtetit, varfërimit dhe shpopullimit të Shqipërisë, mund të recitojë për të gënjyer veten, por nuk gënjen dot shqiptarët për masakrën zgjedhore. Që 25 prilli nuk kishte lidhje me demokracinë e konfirmon edhe OSBE/ODIHR, me blerje masive votash, presion ndaj votuesve, shkrirjen në një të partisë me pushtetin, shpërdorimit të aseteve publike në avantazh të partisë në pushtet, rritje të punësimit fiktiv në administratën publike, presione mbi administratën, përdorimi i fondeve të rindërtimit për të orientuar votën, legalizime në këmbim të votës”, shkruan Basha në rrjetin social “Facebook”. Basha nuk ka komentuar asnjë emërim apo largim në kabinetin e ri të qeverisë “Rama 3”, ndërsa theksoi se po luhet loja e vjetër. “Për të gjitha këto shkelje, Partia Demokratike ka depozituar qindra padi penale në SPAK dhe në prokuroritë e rretheve për krime zgjedhore. Përballë fakteve të patjetërsueshme, drejtësia nuk mund të qëndrojë duarkryq teksa ata që e çuan korrupsionin në nivelin e kapjes së shtetit, vijojnë lojën e vjetër me bedelë të rinj, në dëm të çdo familjeje shqiptare”, shkruan ai. Për atë, dhe për Partinë Demokratike, raporti i OSBE/ODIHR nuk është vetëm “konfirmim i asaj që ne kemi denoncuar dhe që shqiptarët kanë përjetuar prej këtij regjimi të korruptuar, i cili ka vrarë votën e lirë dhe bashkë me të demokracinë”, por sipas tij, një udhërrëfyes për aksionin brenda dhe jashtë vendit.
Fjala është e lirë. Liria është fuqi!
E-mail : info@fjala.al
Ndalohet kopjimi, riprodhimi, publikimi i paautorizuar qoftë origjinal apo i modifikuar në çfarëdo mënyre, pa lejen paraprake të Fjala.al. Shfrytëzimi i materialeve nga ndonjë faqe interneti a medium tjetër pa lejen e FJALA.al, është shkelje e të drejtave të autorit dhe të pronës intelektuale sipas dispozitave ligjore në fuqi.
FJALA MEDIA GROUP
NUIS/NIPT : L92423005H