Kryeministri Edi Rama u shpreh se studentët janë të detyruar të vaksinohen nëse do të ndjekin mësimet në auditore. Në një inspektim në qendrën shëndetësore, së bashku me ministren Manastirliu bëri apel për vaksinim. Ndër të tjera ata thanë se brenda 15 shtatorit do të njihet certifikata e vaksinimit online nga BE.
Certifikata e vaksinimit që marrin shqiptarët do të njihet së shpejti nga sistemi i Bashkimit Evropian dhe kjo mund të arrihet që brenda datës 15 shtator. Kjo u bë me dije nga kryeministri Edi Rama dhe Ministrja e Shëndetësisë, Ogerta Manastirliu, gjatë inspektimeve në qendrën shëndetësore nr.1 në Tiranë. Deri më tani, janë vetëm disa vende që njohin dokumentin e vaksinimit, por nuk njihet në sistemin e integruar online të BE. Rama tha se po punohet për njohjen së afërmi të Certifikatës së Vaksinimit, si pjesë e integruar në sistemin e Bashkimit Europian, ndërsa Manastirliu dha datën 15 shtator, si afat për përfundimin e proceduarave.
Vaksinimi i studentëve
Edhe pse u la me detyrim, që nëse nuk do të bëhet vaksina studentët do të paraqiten me testin PCR në auditore, kryeministri Edi Rama e hodhi poshtë këtë mundësi të dytë. Në fjalën e tij ai tha se kush nuk do të bëjë vaksinën nuk do të futet në auditore. “Duhet të përsëritet që vaksina jo domosdoshmërish të mbron nga infektimi edhe pse probabiliteti i infektimit është shumë i ulët, por në momentin që infektohesh të mbron nga vuajtjet dhe format e rënda. Studentët që nuk do vaksinohen, nuk do të hynë në auditore sepse pjesa që është e vetëdijshëm dhe do të mbrohet, nuk mund të kërcënohet nga ata që besojnë në teori konspiracioni. E njëjta gjë vlen për mësuesit, për administratën. Nuk ta ka borxh pjesa tjetër protestën kundër shkencës, nuk mund të kërcënosh jetën e të tjerëve. Ne kemi shtrirë shumë shpejt vaksinimin masiv dhe sot jemi më të mbrojtur. Ne nuk mund të hyjmë në situata të rrezikshme prej atyre, këtu ndahen gjërat. Masat detyruese po i bën gjithë bota, por ne i kemi më të buta. Po punohet për njohjen së afërmi të Certifikatës së Vaksinimit, si pjesë e integruar në sistemin e Bashkimit Europian”, tha kryeministri.
Muaji i hapur
Ministrja Manastirliu bëri me dije se është rritur numri i qytetarëve të interesuar për t’u vaksinuar, teksa shtoi se deri më tani në vendin tonë ka mbërritur 2 milionë vaksina anti-COVID dhe deri në dhjetor, ky numër pritet të shkojë në 3 milionë. “Numri i vaksinave të mbërritura më shumë se 2 milion, deri në dhjetor pritet që numri të shkojë në 3 mln numri i vaksinave. Me pedagogët dhe mësuesit po ecim mirë dhe data 30 shtator është lënë si një ditë ku do bëhet një bilanc sa i përket mbulesës vaksinale. Do të ketë edhe një monitorim të long COVID dhe të ketë mundësi për të bërë analiza falas në herë në vit, për të moshuarit. Po përgatisin grupe vaksinimi edhe për në universitet dhe në konvikte. Po punojmë që të njihet edhe Green Pass në vendet e Europës besojmë se do arrihet brenda 15 shtatorit”, theksoi ministrja. Ndërkohë, nga 1 shtatori ka rifilluar edhe kontrolli mjekësor bazë, në çdo qendër shëndetësore.
