Ndonëse sytë e shumë shqiptarëve mbrëmjen e djeshme ishin ngulitur para televizorit në “Puskas Arena”, të Budapestit aty ku Kombëtarja mori një triumf historik, në kryeqytetin tonë ishte një tjetër ekran i madh rreth të cilit u organizua një event po i tillë.
Në ambientet e kinema “Millenium”, filmi i fundit i Daniel Craig në rolin e James Bond, pati premierën e tij edhe në Tiranë.
Në një event të organizuar dhe kuruar deri në detaje që të fusnin në atmosferën e filmit më të famshëm britanik, Kreu i Bashkisë së Tiranës, Erion Veliaj dhe ambasadori i ri i Britanisë së Madhe në Shqipëri, Alastair King-Smith, ishin mikpritësit e veçantë të të ftuarve VIP, të cilët u bënë pjesë e shfaqjes premierë.
Veliaj mbajti dhe një fjalim në fillim të eventit ku tha se me premierën e këtij filmi nis edhe një “sprint” marrëdhëniesh mes Shqipërisë dhe Britanisë së Madhe.
Megjithatë të gjithë ishin kuriozë për VIP-at që do të kalonin mbi tapetin e kuq, stili që kishin zgjedhur apo edhe niveli i argëtimit që do të merrnin nga kjo mbrëmje.
Ambasadorë, artistë, gazetarë, por jo vetëm. Drejtuesit e institucioneve më të rëndësishme të drejtësisë dhe ministra gjithashtu kanë marrë pjesë në premierën e filmit “007: S’ka kohë për të vdekur” që u mbajt mbrëmë në metropolin shqiptar dhe që kishte si kusht certifikatën e vaksinimit kundër COVID-19.
Ajo që ra në sy menjëherë ishte se kryebashkiaku Veliaj dhe ambasadori i ri britanik i pritën të ftuarit të veshur si James Bond. Ambasadorja e SHBA-së, Yuri Kim ishte e pranishme gjithashtu me një fustan të zi dhe një shall të hedhur sipër. Kreu i SPAK Arben Kraja, kryeprokurori Olsi Çela, guvernatori i Bankës së Shqipërisë Gent Sejko, Drejtori i ri i Policisë së Shtetit Gledis Nano, ministri i Brendshëm Bledi Çuçi me bashkëshorten. Artistë, këngëtarë e personazhe të shumtë VIP shqiptarë iu bashkuan eventit gjithashtu.
Për më shumë hidhini një sy galerisë më poshtë: