Nën monitorimin e kamerave të një biznesi dhe në prani të shumë dëshmitarëve, një vit më parë, ish-kryetari i Këshillit të Qarkut Kukës Abedin Oruçi kundërshtoi me dhunë dhe kanosi me armë punonjësit e policisë, të cilët shkuan për ta arrestuar.
Megjithatë prokurori kërkoi pushimin e procedimit penal ndaj tij dhe gjykata e aprovoi këtë kërkesë më 18 tetor të këtij viti. Ish-zyrtari lokal ishte i akuzuar për 5 vepra penale; “ndërtim i paligjshëm”, “kundërshtim i punonjësit që kryen një detyrë shtetërore”, “kundërshtimi i punonjësit të Policisë së rendit publik”, “kanosje për shkak të detyrës” e “armëmbajtje pa leje” dhe ka pothuajse një vit në arrati.
Vendim për pushimin e çështjes dhe pezullim të masave shtrënguese, gjykata ka marrë edhe për Ermir Markaj, Eglant Ollomanin, Gazmend Oruçin, Besmir Muçmatan, Zekria Shehun dhe Behar Durakun të cilët po ashtu kundërshtuan policinë gjatë ndërhyrjes se saj për arrestimin e ish-kryetarit të këshillit të qarkut.
Problemet me ligjin për Abedin Oruçin nisën në tetor të vitit të kaluar kur ai kanosi kryetarin e Bashkisë Kukës Safet Gjici dhe truprojën e tij.
Më 18 tetor gjyqtari Sami Ujkashi në një seancë me dyer të mbyllua shpalli vendimin për të pushuar çështjen e këtij procedimi si edhe shuarjen e masave të sigurisë për të gjithë personat përfshirë edhe Abedin Oruçin, i cili kishte 1 vit që i shpëtonte drejtësisë.
Nuk dihet nëse çështja do të apelohet brenda 15 ditësh sipas kodit të procedurës penale pasi ky vendim ngjall dyshime të forta për korrupsion.