Pesë persona janë proceduar penalisht pasi janë kapur duke vjedhur energji, ndërsa është zbuluar edhe një laborator i prodhimit të kriptomonedhave (bitcoin), gjatë një “aksioni” të ndërmarrë nga OSHEE në bashkëpunim me policinë në Krujë dhe në Fushë Krujë.
Për laboratorin e Bitcoin-it u procedua penalisht pronari i objektit F.M, pasi makineria nuk figuron ne emrin e asnjë personi. Të gjitha rastet janë konstatuar nga OSHEE të cilët i kanë denoncuar penalisht në Policinë e Shtetit.
Gjatë kontrolleve të ushtruara në 250 subjekte private janë proceduar penalisht 5 persona, ndër ta dhe një biznes privat pa kontratë të cilit iu gjetën makineri të prodhimit të kriptomonedhave Bitcoin. Mësohet se aksioni sapo ka nisur dhe do vijojë për një kohë të pa përcaktuar.
Të prodhosh bitcoin, përveç kostos së madhe të pajisjeve, kosto ka edhe energjia elektrike që u duhet për të punuar. Në maj të vitit të shkuar Kuvendi i Shqipërisë miratoi ligjin “Për tregjet financiare të bazuara në teknologjinë e regjistrave të shpërndarë” i cili i hapi rrugë zhvillimit të tregut të monedhave virtuale në Shqipëri. Megjithatë ligji ende nuk e lejon këtë aktivitet dhe nuk është licencuar.