Sekretari i Përgjithshëm i Partisë Socialiste, Damian Gjiknuri, në mënyrë indirekte “shpalli” votën e tij kundër vettingut të politikanëve. Ai tha se Shqipëria ka legjislacion të mjaftueshëm për të bërë pastërtinë e figurës së politikanëve. Gjithashtu kjo nismë e PD-së edhe nga aktorë të tjerë politik dhe të shoqërisë civile është parë si tentativë për të mbuluar problemet e brendshme.
Reforma territoriale dhe ajo zgjedhore mund të jenë dy reforma që mund të përqafohen nga Partia Socialiste, ndërsa vettingu i politikanëve duket e vështirë që të pranohet nga mazhoranca parlamenetare. Të paktën kështu e la të nënkuptohej nga Sekretari i Përgjithshëm në Partinë Socialiste. Në një komunikim me median Damian Gjiknuri komentoi propozimet që ka dërguar opozita në Kuvend, ku përveç dy reformave ajo zgjedhore e territoriale kërkohet edhe vettingu i politikanëve. Sa i takon kësaj të fundit, Gjiknuri u shpreh se Shqipëria ka legjislacion të mjaftueshëm për pastërtinë e figurës së politikanit, duke e thënë në mënyrë indirekte se ai është kundër, duke specifikuar se legjislacioni shqiptar ka mekanizma të mjaftueshëm për pastërtinë. “Unë e dhashë përgjigjen time pak më parë. Shqipëria ka legjislacion të mjaftueshëm për të bërë pastërtinë e figurës së politikanëve. Ne kemi ILDKPI për deklarimin e pasurisë, është ligji i dekriminalizimit si dhe është dhe vota e qytetarëve në fund”, tha Gjiknuri. Duket se Partisë Socialiste nuk i intereson që të bëhet vetting i posaçëm për politikanët e të majtës dhe të djathtëës ashtu siç u bë vettingu tek gjyqtarët, prokurorët dhe në Policinë e Shtetit.
Reforma zgjedhore
Për sa i përket Reformës Zgjedhore, ku dhe ai është bashkëkryetari i propozuar nga socialistët, Gjiknuri, theksoi se PS pret të vijë opozita dhe së bashku të caktohen sa më parë grupet e punës si dhe bashkëkryetari. “Unë në fakt pres të vijë opozita dhe të caktojnë dhe njerëzit e tyre për Reformën Zgjedhore. Ka një eksperiencë si nis Reforma Zgjedhore, ajo nis nga rekomandimet e OSBE-ODHIR. Ne i kemi tashmë rekomandimet e OSBE-ODHIR dhe le të fillojmë nga puna”, vijoi Gjiknuri. Gjithashtu Gjiknuri tha se PS është e gatshme të futet në garë në të gjitha bashkitë, ku do të shpallen zgjedhjet lokale nga gjykata Kushtetuese dhe që do të dekretohen nga presidenti. “Patjetër që Partia Socialiste është e gatshme të konkurojë në të gjitha bashkitë që do të ketë zgjedhje dhe që do të dekretohen nga presidenti”, tha Gjiknuri.
Takimi me ambasadorine OSBE
Pasi Partia Socialiste e propozoi për bashkëkryetar të Reformës Zgjedhore, Damian Gjiknuri ka zhvilluar një takim me ambasadorin e OSBE-së, Vincenzo Del Monaco, ku në qendër të diskutimeve ishte Reforma Zgjedhore. Me anë të një postimi në Facebook, Gjiknuri thotë se PS është e gatshme për të filluar sa më shpejt punën, me synim adresimin e rekomandimeve të ODIHR. Ai thotë se pavarësisht pikëpamjeve të ndryshme mes mazhorancës dhe opozitës, Parlamenti ka një historik të pasur të frymës së dialogut dhe bashkëpunimit përsa i takon Reformës Zgjedhore. Po ashtu, Gjiknuri i ka kërkuar OSBE ndihmë me ekspertizë te specializuar. “Me kreun e Prezencës së OSBE-së në Shqipëri, z.Vincenzo Del Monaco, diskutuam mbi procesin e pritshëm të Reformës Zgjedhore. Theksova gatishmërinë e Partisë Socialiste për të filluar sa më shpejt punën, me synim adresimin e plotë të të gjitha rekomandimeve të ODIHR-it. Pavarësisht pikëpamjeve të ndryshme mes mazhorancës dhe opozitës, Parlamenti ka një historik të pasur të frymës së dialogut dhe bashkëpunimit përsa i takon Reformës Zgjedhore. Kërkova mbështetjen e OSBE për të ndihmuar procesin e reformës, me ekspertizën e specializuar të ODIHR-it”, shkruan Damian Gjiknuri”, shkruan Damian Gjiknuri. Po ashtu në tavolinën e diksutimit është edhe reforma territoriale që sipas opozitës ndryshimet kushtetuese duhet të bëhen paketë dhe jo copa-copa.
Manja: Ndëshkohen noteret që abuzojnë me ligjin
Ministri i Drejtësisë Ulsi Manja ka deklaruar se “pastrimi fillon nga vetja” gjatë takimit me kryetaren e Dhomës së Noterëve znj. Mimoza Sadushi. Për Ministrin e Drejtësisë nuk ka qëndrim të dytë për ata noterë që shërbimin dhe besimin ndaj publikut e kthejnë në pazar në kurriz të ligjit dhe qytetarëve. “Çdokush do të përgjigjet para drejtësisë, duke qenë jo vetëm subjekt i drejtorisë përkatëse të profesioneve të lira në ministri, por edhe të Drejtorisë Antikorrupsion”, është shprehur Manja. Më pas të dy zyrtarët, ranë dakort për rritjen e nivelit të bashkëpunimit dhe koordinimit mes dy institucioneve, me qëllim përmirësimin progresiv në çdo aspekt të marrëdhënies që noterët kanë me qytetarët përgjatë punës së tyre.