Sapo doli nga shtypi libri im i tretë, “50 PYETJE PËR 50 PERSONAZHE”, botuar nga UET PRESS. Mes mbi 2 mijë personazheve që ka intervistuar në 25 vjet karrierë, gazetari Roland Qafoku ka përzgjedhur 50 prej tyre, duke i sjellë në një formë të veçantë në këtë libër.
“Ne gazetarët vlejmë për pyetjet që bëjmë, kujt ia drejtojmë ato dhe në cilën kohë ua kemi bërë këto pyetje”.
Duke e shoqëruar veten me këtë postulat, Qafoku tregon se kishte projektuar herët që disa nga intervistat më të mira ti sillte për publikun në një libër.
“Kam besuar se janë intervista të rëndësishme për shkak të atyre që këta personazhe kanë thënë pas pyetjeve që u kam bërë për ato çështje që nuk flasin për ditë. Pra nuk janë pyetje për një çështje të caktuar që pas disa viteve intervista nuk vlen” tha Qafoku.
Sot ka jo pak vlerë çfarë ka treguar dikur detaje për jetën e vet Edi Rama, Olsi Rama, Sali Berisha, Lulzim Basha, Ilir Meta, Erion Veliaj, e shumë e shumë politikanë të tjerë.
Por edhe gazetarë si Armand Shkullaku, Ben Blushi, Mero Baze, Rudina Xhunga, Nikoll Lesi e të tjerë. Apo shkrimtarët si Ismail Kadare, Mira Meksi, Ylljet Aliçka por edhe personazhe të dashur për ne si Artan Fuga, Ermonela Jaho, Ernest Troshani, Ekrem Bardha, e të tjerë. Ky është libri i tretë i gazetartit dhe studiuesit Roland Qafoku pas librit “Historia e 33 kryeministrave të Shqipërisë”, botuar nga Onufri në 2015 dhe “100 vrasjet më të bujshme në Shqipëri” në 2017 nga West print.