Presidenti rus Vladimir Putin do të zhvillojë bisedime me homologun e tij amerikan, Joe Biden, të martën, dhe nuk ka dyshim se Ukraina është në krye të listës për diskutime urgjente pas disa javësh retorikë të përshkallëzuar.
Në prag të bisedimeve mes Biden dhe Putin, SHBA bëri të qartë se do të dërgojë përforcime në Europën Lindore dhe do të vendosen edhe sanksione të rënda ekonomike në rast se Rusia do të tentojë të pushtojë Ukrainën.
Takimi i dy liderëve pritet të zhvillohet pas një jave, ku sipas mediave të huaja, Biden do t’i bëjë të qartë Putin se SHBA nuk do të ndalojë anëtarësimin e ardhshëm të Ukrainës në NATO.
“Sekretari amerikan i Shtetit, Antony Blinken, foli të hënën me presidentin e Ukrainës, Volodymyr Zelenskiy, dhe përsëriti “mbështetjen e palëkundur” të Uashingtonit përballë “agresionit rus”, tha Departamenti amerikan i Shtetit.
Me rreth 100,000 trupa ruse të mbledhura tashmë në kufi me Ukrainën, kjo është kriza më e keqe që nga viti 2015.
Rusia praktikisht ka ngrirë kontaktet e drejtpërdrejta me qeverinë e Ukrainës dhe Zelenskiy, të cilin e ka akuzuar se po përgatit sulm kundër rajoneve të Ukrainës juglindore të kontrolluara nga forcat e mbështetura nga Rusia. Ukraina i ka mohuar me forcë pretendimet.
Sipas analistëve, Moska po kërcënon për të nisur një ofensivë ushtarake në shkallë të gjerë, megjithëse ka vlerësime të ndryshme se sa e mundshme është një ofensivë ruse dhe çfarë mund ta shkaktojë atë.
