Tropoja është mbuluar me petkun e bardhë të dëborës. Pamja është piktoreske por më një problem të madh, atë të pastrimit të rrugëve.
Kryetari i bashkisë, Rexhe Byberi duket se e ka harruar rëndësinë e këtij problemi në një kohë kur është goxha i vështirë qarkullimi në këto rrugë.
Një punëtor që po pastronte rrugën me lopatë, ka thënë se është i detyruar ta bëjë këtë punë sepse përndryshe biznesi në të cilin ai punon do të falimentote, kjo pasi qytetarët nuk shkojnë dot për shkak të rrugëve të bllokuara. 64-vjeçari nga Tirana, i cili punon në një pikë turistike në Tropojë bëri edhe një batutë, duke thënë se e vetmja mënyrë që klientët mund të shkonin ishte me tank.
Ai u shpreh se kanë bërë edhe kërkesë për zhbllokimin e rrugëve, por bashkia e Bajram Currit nuk iu është përgjigjur.
“Një herë në javë i duhet fadromës që të bëjë një xhiro, por nuk vjen fare. Pavarësisht kërkesave që kemi dërguar, ata nuk reagojnë”, tha ai.
64-vjeçari i shqetësuar tha se nuk shkojnë dot as në spital, nëse do të ndodhte diçka e papritur.
“Larg qoftë, po të na ndodhë diçka, nuk shkojmë dot në spital në qytet. Unë kisha për të bërë dozën e dytë të vaksinës anti-Covid, por nuk shkoj dot ta bëj sepse nuk të çon rruga. Bashkia është shumë indiferente, ata shohin vetëm karriget e tyre. Dy vite që punoj unë këtu është i njëjti problem. Të paguash taksat e bashkisë dhe ajo të mos na dëgjojë, është turp”, u shpreh më tej ai.
View this post on Instagram