Shërbimi i Analizës Kriminale, me qendër në Drejtorinë Qendrore të Policisë Kriminale, prezantoi një analizë të thelluar mbi kërcënimin që përfaqëson në Itali krimi shqiptar. Në nivel statistikor, raportimet me origjinë kriminale shqiptare janë në rënie, edhe për shkak të efektit të pandemisë. Por vitet e fundit, për shkak të dhunës brutale dhe agresionit që karakterizon këto banda kriminale, ato kanë parë një evolucion të shpejtë transnacional dhe sot përbëjnë një nga shprehjet kriminale më domethënëse në territorin kombëtar, thuhet në artikull.
Biznesi kryesor i veprimtarive kriminale shqiptare përfaqësohet nga trafiku i drogës (marihuanë, heroinë, kokainë dhe droga sintetike), por interesat kriminale shtrihen edhe në trafikun e armëve, trafikun e qenieve njerëzore dhe shfrytëzimin e prostitucionit. Për sa i përket trafikut të drogës, Shqipëria konsiderohet një udhëkryq strategjik drejt Evropës pikërisht për shkak të të ashtuquajturës rrugë ballkanike.
Më tej artikulli konstaton se një nga elementët që e bën mafian shqiptare mjaft të rrezikshme në Itali është përdorimi i Kanunit. Megjithëse grupet kriminale abuzojnë me përdorimin e këtij Kodi zakonor, ato veprojnë në bazë të rregullave të familjes patriarkale shqiptare, thuhet më tej.
Në studimet e fundit të realizuar mbi mafian shqiptare konstatohet se organizimi i brendshëm i grupeve mafioze ka strukturën e një familje të vjetër patriarkale dhe që operon në formën e klanit ku shkeljet e rregullave zakonore dënohen rreptësisht, veçanërisht pabesia.
“Krahas formimit të komuniteteve të mëdha në territorin italian, flukset migratore drejt Italisë kanë çuar edhe në zgjerimin e krimit shqiptar, i cili është përhapur dhe ka evoluar nga organizimi i brendshëm bazuar në përkatësitë familje dhe klane, i bazuar, rreptësisht nga rregullat e huazuara nga Kanuni. Kanuni është një përmbledhje dispozitash të së Drejtës Zakonore, që datojnë që në Mesjetë, e cila sot përdoret në mënyrë të krejt të çrregullt nga grupet kriminale; aty identifikohet bërthama ideale e shoqërisë, siç është familja patriarkale e cila dënon shkeljen e rregullave shoqërore sidomos në tradhtinë apo pabesinë ndaj familjes” – shpjegohet në artikull.
Më tej theksohet se këto organizata karakterizohen nga qëndrime të forta kriminale në nivel ndërkombëtar, ku kombinohen elementët tradicionalë me ato modernë e inovatorë.
“Organizatat kriminale shqiptare karakterizohen nga qëndrime të forta kriminale në nivel ndërkombëtar, duke kombinuar karakteristikat tradicionale (disiplinë e brendshme e ngurtë, strukturë e organizuar në klane, hermetikë, besueshmëri) me elementë e rinj dhe modernë si lidhjet ndërkombëtare, aftësia tregtare si dhe aftësia për të vepruar në sektorë të larmishëm të botës së krimit”.
