Partia Demokratike, në tentativë për tu bashkuar duket se po shkon drejt ndarjes. Kryetari në detyrë Enkelejd Alibeaj ka thirrur Grupin Parlamentar të PD-së, duke u bërë ftesë të pezulluarve por jo Berishës dhe grupit tjetër të përjashtuar.
Sot do të zhvillohet mbledhja e parë e përbashkët mes Komisionit të Rithemelimit dhe grupit parlamentar. Kryetari i komanduar i Partisë Demokratike, Enkelejd Alibeaj, ka thirrur mbledhjen e grupit parlamentar të PD-së. Mbledhja do të zhvillohet mëngjesin e sotëm, por ajo që bie në sy është se lajmërimi i është dërguar të pezulluarve, por jo të përjashtuarve. Deputetët e pezulluar, të cilët janë njoftuar, janë Oerd Bylykbashi, Belind Këlliçi, Edi Paloka, Agron Shehaj dhe Tritan Shehu. Ndërkohë që deputetët e përjashtuar, të cilëve njoftimi për mbledhje nuk u ka shkuar, janë Sali Berisha, Albana Vokshi, Flamur Noka, Edmond Spaho dhe Luan Baçi. Sali Berisha u shpreh, këtë të mërkurë, se ai do të marrë pjesë në mbledhjen e grupit parlamentar të Partisë Demokratike, e cila është njoftuar nga Enkelejd Alibeaj që do të mbahet ditën e sotme. Berisha tha për mediat se grupi parlamentar i PD nuk është i ndarë dhe se për mbledhjen e njoftuan kolegët e tij. “I pari që do të jetë në atë mbledhje është Sali Berisha. Sali Berisha ka një detyrim madhor, absolut nga Kuvendi i 11 dhjetorit, të konfirmuar me referendumin e 18 dhjetori dhe votimin e 6 marsit”, tha Berisha.
Reagimi i PD-së
Ndërkohë, ndaj Berishës ka reaguar sekretari i Përgjithshëm i PD-së, Gazment Bardhi. Me anë të një postimi në Tëitter, ai shkruan se askush nuk duhet t’i imponohet apo të injorojë mendimin e Grupit Parlamentar, kjo është përdhosje e dinjitetit të çdo deputeti. “Një parti ku nuk respektohet vullneti, qëndrimi dhe vlerësimi i Grupit Parlamentar, është parti personale, por jo demokratike. Askush nuk duhet t’i imponohet apo të injorojë mendimin e Grupit Parlamentar, kjo është përdhosje e dinjitetit të çdo deputeti. Deputetët duhet të kenë të drejtë pa asnjë kompleks apo presion të bëjnë vlerësimin e tyre nëse një person i shpallur nongrata nga SHBA-ja duhet apo jo të jetë pjesë e grupit. Deri atëherë askush nuk mund të imponohet. Çdo sjellje tjetër që i imponohet me kokëfortësi grupit parlamentar, pa e pyetur dhe duke e injoruar atë, është e papranueshme dhe jo demokratike”, tha Bardhi. Në këtë mbledhje janë dhe anëtarë nga Komisioni i Rithemelimit të ish-kryeministrit Sali Berisha, por ky i fundit, nuk do të jetë i pranishëm për shkak se është i përjashtuar nga grupi parlamentar. Kjo mbledhje vjen menjëherë pasi depuetët e PD-së kanë kërkuar që të ulen në tavolinë për të negociuar një zgjidhje të përbashkët për situatën brenda kampit opozitar.
PD rivendos logon e vjetër e partisë
Në ambientet e godinës së Partisë Demokratike po punohet prej disa ditësh për të hequr “gjurmët” e lëna nga Lulzim Basha, pas dorëheqjes së tij. Komisioni i Rithemelimit i PD, me marrjen nga gjykata të së drejtës si organi që tashmë drejton partinë, ka nisur me kthimin e godinës ‘në identitet’, dhe logos së vjetër që kanë pasur demokratët. Këtë të mërkurë, siç e shikoni në pamjet e siguruara nga Panorama, po punohet për të lyer fasadën e jashtme të godinës si dhe me vendosjen e logos së mëparshme të PD. Po ashtu, punime janë duke u kryer dhe në ambientet e brendshme të godinës, ku siç duket nga pamjet, po vendosen postera të momenteve kyçe të arritura gjatë kohës së qeverisjes së PD, si lëvizja e lirë pa viza në Europë e shqiptarëve, në vitin 2010. Ndërkohë që pak ditë më parë, u hodhën në tokë dhe dyert e blinduara të vendosura nga Lulzim Basha në PD para protestës së 8 janarit. Grupi i Rithemelimit, mbështetës të Sali Berishës kanë deklaruar se ata do të bëjnë gjithcka për të hapur partinë dhe për ta bashkuar deri në fitore kundër pushtetit të Ramës.
Mbledhja e PD
Garo: Besimi i demokratëve në mandatin e Berishës u konfirmua më 6 Mars
Zëdhënësja e ish-kryeministrit Sali Berisha Floriana Garo i është përgjigjur kryetarit të komanduar të Partisë Demokratike Enkelejd Alibeaj i cili ka thirrur ditën e sotme mbledhjen e grupit parlamentar të PD. Garo shprehet se mandati i çdo deputeti është marrë më 25 Prill nga votuesit e Partisë Demokratike, duke iu referuar këtu edhe deklaratës së sekretarit të Përgjithshëm të PD Gazment Bardhi. Ajo shton se besimi i demokratëve në mandatin e Berishës është konfirmuar në 11 Dhjetor, 18 Dhjetor dhe me pas ne 6 Mars. Në deklaratën e saj, Garo shprehet se ka marrë fund koha kur vota e demokratëve zëvendësohej me urdhra dhe vullnete të liga duke theksuar se vetëm të bashkuar mund të ecim përpara dhe të fitojmë.
Mbledhja e qeverisë
Ibrahimaj: Miratohet vendimi për indeksimin me 3.3% të pensioneve
Pas mbledhjes së qeverisë, ministrja e Financave dhe Ekonomisë Delina Ibrahimaj deklaroi se është kaluar vendimi për indeksimin me 3.3% i pensioneve për të gjitha kategoritë. ”Një nga masat që kaluam është indeksimi me 3.3% i pensioneve për të gjitha kategoritë e pensioneve dhe të plota e të pjesshme. Pensionet në qytet, fshat, që jepen për ndihma të posaçme shtetërore të gjitha kategoritë e pensioneve jo vetëm pensionet, por edhe indeksimi i shtesës. Kjo ka kosto prej 3.3 miliardë lekësh ne buxhet”, tha ajo.
