Presidenti i Finlandës, Sauli Niinisto ka zhvilluar një bisedë telefonike me homologun e tij rus, Vladimir Putin për ta vendosur në dijeni se vendi i tij do të aplikojë në NATO në ditët në vijim.
Në një deklaratë të publikuar për mediat, Niinisto thotë se gjatë bisedës me Putin, ai i ka shprehur shqetësimin për lëvizjet e fundit të Rusisë për të bllokuar Finlandën.
“Biseda ishte konçize dhe e drejtpërdrejtë. U mundova të evitoj tensionet gjatë bisedës” – thuhet në deklaratën e Presidentit finlandez.
Ndërkohë mediat ruse kanë publikuar anën tjetër të bisedës mes dy presidentëve. Sipas tyre, Presidenti Putin ka deklaruar se momentalisht nuk ka probleme për sigurinë e Finlandës.
Ai shton se do të ishte një gabim i rëndë nëse Finlanda del nga statusi i saj neutral.
Sipas Kremlinit, ky ndryshim do të dëmtonte marrëdhëniet mes dy vendeve, të cilat janë krijuar prej vitesh.