Dy persona janë vrarë dhe 14 të tjerë kanë mbetur të plagosur në një lokal homoseksualësh në Oslo të Norvegjisë. Mësohet se një person, ka hyrë në ambientet e lokalit dhe ka nxjerrë nga një çantë armën me të cilën ka qëlluar. Për pasojë, një paradë e LGBTQI+ e planifikuar për këtë të shtunë në Oslo është anuluar.
Dëshmitarët thanë se autori i ngjarjes i kishte të qarta synimet e tij dhe tregojnë se shumë persona u plagosën rëndë.
“Ai dukej shumë i vendosur se ku do të qëllonte. Kur kuptova se ishte serioze, vrapova. Ishte një burrë i gjakosur i shtrirë në tokë”, tha një grua që pa incidentin.
“Kishte shumë të plagosur në tokë që kishin lëndime në kokë”, tha një tjetër dëshmitar.
Policia ka qenë në patrullim pikërisht në atë zonë dhe autori i dyshuar i ngjarjes është arrestuar brenda 5 minutave. Ende nuk dihet arsyeja e këtij sulmi.
