Një gërmues ari ka zbuluar një foshnjë mamuthi leshi të mumifikuar në Yukon, Kanada. Sipas analizave të deritanishme , duket se foshnja mamuth ishte femër dhe quhej Nun cho ga, që do të thotë “kafshë e madhe, foshnjë” në gjuhën tradicionale Hän, e folur nga popullatat vendase.
Për momentin rezulton të jetë mamuthi më i plotë i mumifikuar i zbuluar në Amerikën e Veriut. Është e sigurt që Nun cho ga bredhi në Yukon për një kohë të gjatë, së bashku me kuajt e egër, luanët e shpellave dhe bizonët gjigantë të stepës. Ai jetoi rreth 30,000 vjet më parë dhe pas ngordhjes mbeti i ngrirë në permafrost gjatë epokës së fundit të akullit.
Grant Zazula, një paleontolog në qeverinë e Yukon, tha se minatori bëri atë që tani konsiderohet “zbulimi më i rëndësishëm në paleontologji në Amerikën e Veriut”. Dan Shugar i Universitetit të Calgary-t, i cili ishte pjesë e ekipit që gërmoi dhe nxori mamuthin e leshtë, tha gjithashtu se ky zbulim ishte “gjëja shkencore më emocionuese ku kam qenë pjesë e ndonjëherë”.
Me siguri, pak para vdekjes së tij, mamuthi i vogël ishte me të ëmën dhe kishte ngrënë me të në një zonë të pasur me barishte, deri kur u largua shumë larg saj dhe ngeci në një zonë me baltë, e cila u bë varri i tij. Kjo e lejoi atë të ruhej në mënyrë perfekte deri më sot, aq sa kur u zbulua kishte ende thonjtë e këmbëve, lëkurën, flokët.
Edhe pjesët e brendshme të kafshës ishin të paprekura, me vaktin e fundit të barit ende të pranishëm në stomak. Yukon, në fakt, është i njohur për depozitimin e fosileve të epokës së akullit, por rrallë zbulohen artefakte të tilla të papërlyera dhe të ruajtura mirë. Mamuthi ishte një kafshë me madhësinë e elefantit afrikan, ai endej në shumë zona të planetit deri rreth 4000 vjet më parë. Sapienët e gjuanin atë për të marrë ushqim. Deri më sot ka një polemikë për arsyet e zhdukjes së tyre: disa studiues spekulojnë se ishte kryesisht gjuetia, ndryshimi i klimës ose ndoshta të dyja.
