Banorët dhe pushuesit në Shëngjin kanë marshuar ditën e sotme në shenjë homazhi për ngjarjen e ndodhur në plazhin e Potamit, aty ku 7-vjeçarja Jonada Avdia u vra nga skafi i Arjan Tases.
Në heshtje, me lule e qirinj në duar, qytetarët i janë drejtuar vendngjarjes ku kanë hedhur lule për vogëlushen që iu pre jeta në mes. I pranishëm ishte dhe Dom Gjergj Meta i cili në breg të detit ka bërë edhe një lutje për shpirtin e Jonadës së vogël.
Qytetarët më pas kanë hedhur lulet në det, si shenjë përkujtimi të 7-vjeçares. Ishte Lejla, një vajzë 6-vjeçare, ajo që ka hedhur e para lulet në det dhe më pas të gjithë qytetarët kanë vazhduar, duke ndezur edhe qirinjtë.
