Përsëri probleme në shtëpinë e Torino-s. Pas sherrit të filmuar dhe të publikuar në rrjetet sociale mes trajnerit Juric dhe drejtorit sportiv Vagnati, ka plasur një tjetër skandal te ekipi i Serisë A në prag të debutimit në kampionat në shtëpi kundër Monza-s.
Protagonisti është Sasa Lukic, kapiteni i ri i ekipit pas lamtumirës së Belotti-t. Serbi, siç ka bërë të ditur La Stampa, nuk është paraqitur në stërvitje.
Zyrtarisht për probleme fizike, por mbrapa këtij vendimi duket se ka çështje të lidhura me merkaton: oferta të ndryshme nga disa klube (mes të cilëve edhe Roma), një kontratë që i skadon në 2024-ën dhe asnjë rinovim në horizont me rritje rroge.
Trajneri Juric e ka marrë shumë keq vendimin e lojtarit dhe ka vendosur të mos e grumbullojë për ndeshjen e sotme.
Tani, klubi do të duhet të punojë për të shuarin zjarrin e radhës brenda ekipit.