Kriza energjitike është kthyer në shqetësimin kryesor të shteteve në gjithë Evropën, ndikuar kjo nga lufta në Ukrainë dhe ndërprerja e gazit rus. Kësaj situate, nuk mund t’i shpëtojë as Shqipëria, megjithatë shqetësimit të qytetarëve i ka dhënë përgjigje drejtori i KESH Ergys Verdho.
Ndërsa bëri thirrje për Komisionin Europian për ndihmë dhe thirrje për qytetarët për kursim, Verdho u shpreh besimplotë se nuk do të ketë ndërprerje të energjisë.
“Në momentin kur konsumi bie nën 800 kilovat nuk do të ketë ndërprerje sepse korporata elektro-energjitike s’do të dali për të importuar, do të prodhojë vetëm nga rezervat e saj dhe nuk ka ndodhur ndonjëherë në historinë e korporatës elektro-energjitike që të fillojë nga qershori i vitit 2021 dhe deri në gusht që të mos ketë asnjë shi,” – u shpreh ai për Euronews Albania.
Ndërkohë shtoi se nëse këtë dimër nuk ka reshje mjaftueshëm do t’i drejtohen importit të energjisë për të përmbushur kërkesat. Verdho u shpreh se deri më tani situata është normale, por nëse reshjet mungojnë, situata do të jetë problematike pasi çmimi është shumë i lartë.
