Një nga temat më të nxehta në botë, por edhe në vendin tonë është aktualisht kriza energjitike. Anëtarët e qeverisë njëzëri kanë bërë thirrje për kursim të energjisë si dhe kanë ngritur alarmin se na pret një dimër i vështirë.
Jo më larg se dy ditë më parë qeveria tha se do të vazhdojë të mbështesë konsumatorët familjarë si dhe bizneset e vogla do vijojnë të mbrohen nga rritje e çmimit të energjisë, por theksoi se ata që harxhojnë më shumë se 800 kilovat do të paguajë energjinë me çmimin e tregut pa përfituar nga mbrojtja.
Po ashtu, sikurse po ndodh dhe në vende të zhvilluara evropiane, anëtarët e kabinetit qeveritar shpesh sugjerojnë masa të ndryshme sesi të kursehet energjia, ndërkohë që shpesh në kryeqytet apo në rrugët kryesore të qyteteve të ndryshme të fiken dritat për këtë qëllim.
Ndërkohë në 1 video të mbërritur në redaksinë tonë, shihet sesi gjatë natës kur ka shumë pak qarkullim, në autostradën Durrës-Rrogozhinë, dritat rrugore përgjatë këtij aksi mbahen ndezur.
E në një kohë kur po bëhet thirrje për kursim masiv të energjisë dhe rritje të çmimit të saj, përse nuk jepet shembulli sesi duhet kursyer pikërisht duke nisur nga këto akse rrugore?
