Fundjava sportive nisi si rrallëherë me mungesën e futbollit të magjishëm anglez të Premier League si pasojë e ndarjes nga jeta të Mbretëreshës Elizabeth II duke anulluar kështu ndeshjet respektive të javës së 7 të kampionatit.
Megjithatë, emocionet kurrë nuk mungojnë në botën e sportit. Fitore të rëndësishme në Itali, triumfe historike në basketboll dhe një spektakël i vazhdueshëm në La Liga të Spanjës.
Për këto dhe shumë të tjera, ndjekim disa nga titujt kryesorë të mediave sportive për ditën e sotme.
“La Gazzetta dello Sport” hapet me titullin: Testi i Milanit. Ekipi i Stefano Piolit arriti një fitore të rëndësishme në Serie A në një transfertë të vështirë kundër Sampdorias.
Kuqezinjtë vuajtën jo pak pasi Leao u largua me karton të kuq duke e lënë skuadrën e tij me 10 lojtarë të cilët gjetën golin e fitores me anë të një penalltie të realizuar nga Giroud.
E përditshmja “Tuttosport” ndalet tek gara e shumëpritur e Formula 1 ditën e sotme si dhe sfida e Juventus në mbrëmje kundër Salernitanës. “Ferrari, të paktën në Monza” shkruan prestigjozja italiane duke iu referuar kështu pole position të Leclerc i cili synon fitoren në pistën vendase. “Juve, nuk është më PSG”. Skuadra e Allegrit kërkon të rikthehet te fitorja pas zhgënjimit në Champions League kundër PSG.
Francezja “L’Equipe” zhvendos fokusin te ecuria fantastike e Marseille të cilët regjistruan fitoren e 5 radhazi duke barazuar me pikë ekipin e PSG. “Drejt përpara” shkruan gazeta e njohur pas suksesit të merituar mbrëmjen e djeshme kundër skuadrës së Lille me rezultatin 2-1.
Në Spanjë, e gjithë vëmendja ditën e sotme do të jetë në finalen e US Open ku talenti 19-vjeçar Carlos Alcaraz kërkon Grand Slam-in e parë në karrierë. “Mos e quaj ëndërr” shkruan media e njohur “AS”. Spanjolli shihet si favorit në përballjen kundër norvegjezit Kasper Ruud dhe tashmë suksesi historik duket gjithnjë e më pranë.
“Jeni të mëdhenj” shkruan e përditshmja spanjolle “Marca” për triumfin historik të kombëtares spanjolle të basketbollit kundër Lituanisë, duke prekur kështu çerekfinalet e Europianit të Basketbollit.
Së fundmi, gazeta “Sport” flet për suksesin e radhës së Barcelonës, e cila duket se nuk ka rivalë këtë sezon. “Sport” hapet me titullin “Një tjetër goleadë”, me sulmuesin polak Lewandowski i cili nuk rresht së shënuari për skuadrën katalanase.
