Një ngjarje jo shumë e zakonshme ka ndodhur në Tiranë ditën e sotme. Zjarrfikësit e Tiranës kanë shpëtuar një kotele që kishte ngecur në majë të një peme dhe ishte në rrezik për jetën.
Kotelja u përkiste dy vajzave, të cilat kanë njoftuar zjarrfikësit me këta të fundit që u janë përgjigjur pozitivisht thirrjes së vajzave dhe kanë shkuar në vendngjarje. Mund të ndodhë që zjarrfikësit në vendin tonë të vonohen kur digjet ndonjë banesë dhe rrezikohet ndonjë njeri, por kurrsesi kur bëhet fjalë për kotele.
Ngjarja ka ndodhur pranë Hotel Diplomat, në zonën e “Vasil Shantos”, në kryeqytet. Nga pamjet e dërguara në redaksinë tonë duket momenti kur zjarrfikësi hero e pret kotelen me duar dhe e mban atë disa minuta si trofeun më të mirë që zjarrfikësit kanë realizuar kohët e fundit.
Pra nëse banesa ose jeta juaj është në rrezik nga ndonjë zjarr, nuk ju premtojmë dot se zjarrfikësit do jenë aty në kohën e duhur për tu shpëtuar, por nëse macja juaj ndodhet në rrezik, telefonojini ata pa u menduar dy herë.
