Kryeministri i Shqipërisë, Edi Rama, i cili ndodhet në Shtete e Bashkuara të Amerikës ku do të marrë pjesë në Asamblenë e OKB-së, ka folur për sulmin kibernetik të Iranit ndaj Shqipërisë.
Në një intervistë për “Opinion” kryeministri Edi Rama është pyetur se sa e rrezikuar është Shqipëria nga një sulm terrorist iranian, Rama tha se deri në këto momente nuk ka informacione të tilla për një rrezik të shtuar.
“Nuk kemi të dhëna që ndihemi të rrezikuar, por nga ana tjetër kemi një regjim diabolik, dhe mund të jetë i paparashikueshëm përsa i përket këtyre ngjarjeve. Të dhënat e deritanishme tregojnë se nuk jemi të rrezikuar,”- tha Rama ndër të tjera.
Ndërsa shtoi se gjithsesi Shqipëria po monitoron gjithçka, pasi përballë kemi një regjim diabolik dhe të paparashikueshëm.
“Është një bombardim ndaj sistemeve tona digjitale me një synim të qartë që nuk e them unë, por skuadrat që janë marrë me këtë, për të zhdukur arkivat. Jemi 100% të bindur që Irani fshihet pas sulmeve kibernetike sepse kemi bërë një hetim shumë të thellë. Kemi prova, prova të nxjerra nga hetimet. Përputhen plotësisht të gjitha, edhe nga hetimi i dalë nga Microsoft”, tha ai.
