Presidenti serb, Aleksandër Vuçiç, ka marrë pjesë në ceremoninë e inaugurimit për hapjen e gazsjellësit Greqi-Bullgari në Sofje. Në fjalimin e tij në ceremoni, Vuçiç u shpreh se ishte i shqetësuar për mënyrën se si do të trajtohej nga presidentja e Komisionit Europian Ursula von der Leyen pas ngjarjeve të fundit.
Në mënyrë karakteristike Vuçiç tha se ndihet si delja e zezë nën shoqërinë e pjesëmarrësve në ceremoni, ndërsa kërkoi nga presidentja KE të përfshijë edhe vendet e Ballkanit në planet e BE-së.
“Besoj se do të kemi një dimër dhe një vjeshtë të vështirë, edhe më të vështirë sesa tha këtu presidentja e Komisionit Evropian Ursula Von der Leyen. Kisha një dilemë para se të vija këtu se si do të sillej me mua, por ishte shumë e sjellshme. Ndihem pak si ‘delja e zezë’ këtu në shoqërinë e miqve dhe duhet ta falënderoj edhe pse nuk dua t’i bëj lajka. Ajo na ndihmoi shumë kur foli për ndërtimin e një ndërlidhësi ndërmjet Serbisë dhe Bullgarisë dhe më pas Maqedonisë së Veriut”, tha Vuçiç.